Serchhip District-a COVID-19 hri kai zinga za zela 51.81 te chu Covid-19 Vaccine la lo an ni

Nimin thleng khan Serchhip District-ah COVID-19 hri kai mi 14,010 hmuhchhuah an ni tawh a, COVID-19 hri kai zingah hian a zatve aia tam te chu Vaccine la lo an ni.

Serchhip CMO Office atanga thu kan dawn danin Serchhip District-a nimin thlenga COVID-19 hri kai hmuhchhuah tawh mi 14,010 zinga 7259 te hi COVID-19 Vaccine la lo niin hei hi hri kai hmuh tawh atanga chhutin za zela 51.81 an tling a, hetihlai hian Vaccine Dose 2 na baka Precaution Dose la tawh zingah COVID-19 hri kai mi 86 awm bawkin hri kai hmuhchhuah atanga chhutin za zela 0.61 chauh a ni thung. COVID-19 hri kai zinga mi 635 te chu Vaccine Dose 1-na la tawh niin hri kai hmuhchhuah atanga chhutin za zela 4.53 an ni a, Vaccine Dose 2-na thleng la mi 6030 awmin hri kai atanga chhutin za zela 43.04 an ni thung a. Nikum January 21-a Serchhip District-a COVID-19 Vaccine pekchhuah a nih hma khan Serchhip District-ah hian COVID-19 hri kai mi 143 hmuhchhuah an lo ni tawh thung a ni.

Hetihlai hian Serchhip District-a COVID-19 hri kai boral mi 35 awm tawh zinga mi 9 te tihloh chu COVID-19 Vaccine la lo vek an ni tih thudawnna chuan a sawi bawk a, Serchhip District-a COVID-19 vanga thi zinga mi pakhat chu Vaccine dose 1-na la tawh niin midang 8 te chu Vaccine Dose 2-na la tawh an ni a, a bak mi 24, za zela 68.57 te chu Vaccine la lo vek an ni.

Serchhip District-a COVID-19 hri kai hmuhchhuah tawh mi 14,010 zingah hian kum 17 hnuailam mi 4898 zet awmin hei hi hri kai hmuhchhuah tawh atanga chhutin za zela 34.96 zet an tling a, kum 60 chunglam mi 1327 awm bawkin hei hi hri kai hmuhchhuah atanga chhutin za zela 9.47 an ni bawk a, Serchhip District-a COVID-19 hri kai hmuhchhuah zingah hian kum 100 leh a chunglam mi pakhat awmin kum 91 leh 100 inkar mi 23 an awm a, kum 81 leh 90 inkar mi 155 awmin kum 71-80 inkar 462 leh kum 61-70 inkar mi 686 an awm a ni. Heng bakah hian kum 18-21 inkar mi 918 awmin kum 22-29 inkar 1755, kum 30-40 inkar mi 2507, kum 41 leh 50 inkar 1544 leh kum 51 leh 60 inkar mi 1061 an awm bawk a ni.