SEDP sem a nih ring lo ten an hnar an hmu lian mek - Robert Romawia

Sports Minister Robert Romawia Royte chuan SEDP sem a nih ring lo ten an hnar an hmu lian mek niin a sawi.

MNF Party in nimin-a Mizo Hnam Run Chhung Inkhawm an neih ah Sports Minister Robert Romawia Royte hian thu sawiin SEDP chu Party body ni lovin, Dan ang thlapa sawrkarin inkhaidiat fel taka a din Committee ten an relin a dawngtu turte an thlang ang, a ti a. Pilot project atan Trade hran hranah hmalak tawh mek a nih thu sawiin, “Vawk vulhah phei chuan cheng nuai 3 dawng kim tep an awm tawh hial a, kan hotute sawi angin a kal zel a ni,” a ti a. Hei bakah hian infrastructure lian atana kan hman phei chu sawi tur tam tak a awm tih sawiin, “Sawrkarin sum a release hi instalment-a pekchhuah zel thin a ni a, chu chu SEDP kal dan tur pawh a ni. Tunah chuan SEDP sem a nih ring lo ten an hnar an hmu lian mek a, a dawn loh hlautu ah an tang ta zawk a, chu chuan Party dangte a sawi thiat mek a ni,” a ti. Hei bakah hian Robert Romwia chuan Social Media kan hman tangkai thiam a tul thu leh, thudik pholan nana hman a tul thu sawiin, Social media hmanga thu belhchian dawl lo vawrhdarh chingte an tlahniam zel niin a sawi bawk.