Sakei awm hnuah Aizawl Sahuan tlawhtu an pung

Zonuna Kawlni (LENKAWL) • June 6, 2022 • Comments • Mizoram

Aizawl Zoological Park (Sahuan) chu tunhnai ni 90 (April - May) chhung velin mi 12,260 in an tlawh a, tlawhtute atangin Rs. 2,29,420 hmuh a ni.

Aizawl Zoological Range Officer hnen atanga Zalen thu dawn danin, tunhnaia Sakei dah a nih atangin Sahuan tlawhtu an tam zual a, Sahuan tlawhtu tam ber te pawh Sakei en tur a kal an ni. May 2022 chhungin, Aizawl Zoological Park chu ni 26 chhung mipuite tlawh theih tura hawn a ni a, hemi chhung hian tlawhtu mi 3,763 an awm a, tlawhtute luh man atangin Rs. 58,500 hmuh a ni a. Sahuan tlawhtute lirthei dah man atangin Rs. 13,440.00 hmuh a ni bawk a, Camera (still/video) atangin Rs. 700.00 hmuh a ni bawk a, a vaiin Rs. 72,640.00 hmuh a ni.

April thla khan mi 8,497 in Sahuan an tlawh a, chuta tanga sum hmuh chu Rs. 1,24,680 tlingin lirthei dah man atangin Rs. 30,450 leh Camera atangin Rs. 1,650 hmuh a lo ni tawh bawk a. Fur ruahtui a tlak tawh vangte leh sikul luh tan anih tawh avangin Sahuan tlawhtute hi thla hmasa lam ai chuan an tlahniam a ni. Aizawl Zooligical Park-ah hian ramsa/sava chi hrang hrang 47 awmin, a vaiin 377 a awm mek a ni.