MPCC in insawifiah tura a tihna MDCC in chhang

Mara Autonomous District Council (MADC)-a Congress leh MNF ten sawrkar intawm an siam chungchanga Mizoram Pradesh Congress Committee (MPCC) Disciplinary Action Committee in insawifiah tura Mara District Congress Committee (MDCC) a tihna chu an chhang tawh tih MDCC hruaitute chuan an sawi.

Mara District Congress Committee (MDCC) President S. Hiato chuan MPCC Disciplinary Action Committee in insawifiah tura hriattirna (show cause notice) a pek hnuah May 31 khan chhanna an thawn tawh tih a sawi a. North East Democratic Alliance (NEDA)-ah BJP leh MNF chu inzawm sa an nih avangin anni in sawrkarna siam mai sela Congress Party chu lang lo tur an nih thu te, mahse an kal zelna turte leh an mite Opposition a awm rei tawh te an thlirin, Ruling a thut ve an duh thute chu Show Cause Notice chhannaah chuan an tarlang tih a sawi a ni. 

Hei bakah hian Congress Party PAC duh dan kalha an chet nachhan tarlangin, pawi an tih thu an tarlan bakah bye-election neih chu an zo lo nia an hriat thu te an tarlang niin S. Hiato chuan a sawi a, Show Cause Notice inpek chuan boruak tha lo a thlen a rin loh thu sawiin, an hotuten an tih tur dik tak an tiah a ngai tih a sawi a. “Mizoram pumpui thlir tur an nih avangin an tih tur dik tak an ti ah ka ngai a, boruak chhia a awm ka ring lo,” tiin, “Amaherawhchu, kan chhan hnu a action rit tak a awm erawh chuan ka hrethiam lo, chutiang chu a awm lo turah erawh kan beisei,” a ti bawk.