NH. 54 laihzauh hna thawh meka Serchhip District chhunga leivung paih dan a hmunah enfiah a ni

Serchhip District Level Monitoring Committee on Implementation of JICA on National Highway-54 chuan Serchhip District chhunga NH. 54 kawngpui laihzauh hna thawh meka hnathawktu ten leivung an paih dan nimin khan a hmunah kalin an enfiah a, NHIDCL hotute leh an hnuaia Contractor te pawh an kawm nghal bawk.


Serchhip District chhunga NH. 54 kawngpui laihzauh hna thawh meka leivung paih dan enfiahtu Serchhip District Level Monitoring Committee on Implementation of JICA on National Highway 54 te hi Addl. DC Lalmuansanga Ralte hova thawkchhuakin Khumtung khua atangin leivung paihna te hi an enfiah a, Khumtung-ah hian Aizawl District lama hnathawktu Gawar Construction Pvt. Ltd. ten kawngpui awmsa kianga leivung paihna tur (Spoil Bank) an ruahman pahnih chu a thlang lawkah Tuirini hnar a awm avangin Spoil Bank atan hman tlakloh ah ngaiin thla hnih (2) chhunga hmundang, hmantlak tur lo ngaihtuah turin an ti a. Company hotute chuan Spoil Bank atan hian hmundang ruahman nei mah se a hmun a hlat avangin helai hmuna ram neitute nen inremna neia leivung hi paih tum an ni tih sawiin, helai hmuhah hian leimin an paih bak an la paih loh thu an sawi a ni.


Hemi hnu hian Khumtung leh Keitum thlenga kawngpui laih leh siamthat hna thawktu KRAM Infracon Pvt. Ltd. te hnathawhna hmun chu enfiah chhunzawm nghal a ni a, Baktawng khaw hnuai a mi chu tha thawkhat ah ngaiin Buhkangkawn bula mi chu an hmaan tawhloh thu Company te hian an sawi a, Chhingchhip leh MIFCO Complex bula Spoil Bank pahnih te chu a thlang lama dawlna an siam tawh in a dawl zo dawn lo nia a lan avangin tuna awmsa aia sanga siam belh tul nia an hriat thu pawh an sawi a, an hnathawh hrang hrangte chu an tlawhchhuak a ni.

Hemi hnu hian Serchhip leh Chhingchhip inkar Thinghmunkawn-a KRAM Infracon Pvt. Ltd. Complex-ah Monitoring Committee leh he hna thawktute chuan inkawmna hun nei nghalin Monitoring Committee chuan NHIDCL aiawhte leh an hnuaia Contractor te chuan chak takin hna thawk se an duh thu an sawi a, chutih rual chuan sawrkar laipuiin ramngaw leh nungchate leh a chhehvel ramte himna atana dan a siamte tha taka an zawm a tul tih an sawi bawk a ni.


Serchhip leh Chhiahtlang-a khawpui chhung helna tur, By-Pass road bikah pawh Environment clearance an la neih loh thu leh hna tan theihna khawp phalna (in principle approval) takngial pawh an la nei lo chu a ranglama umzui turin an duh thu an hrilh a. Clearance an la neih loh avang hian Dan anga Stay Order pawh pek an nih thu an hrilh bawk a ni.

Tuna hnathawh mek aah te pawh a thawh dan tur ruahmanna awmsa ang ngeia thawka, leivung paihna hmun atana thlanah chauh leivung paih ngei turte, an leivung paih tawhna kalsan ngaite pawh mumal taka a dawlna an siam phawt loh chuan tawng-pawng chhuahsan an remtihloh thute an hrilh a. Heng leivung paihna hmun hrang hrang umzui dan tur an sawihote hi Contractor ten fel fai taka an hmalak zui dan tur an ziah chu Deputy Commissioner ah thla khat chhungin an thehlut ang a, District Level Monitoring Committee te nen a tul angin a hmunah kalin an enfiah leh dawn a ni.


Nimin-a heng hmun enfiahna ah hian Monitoring Committee-a Member Secretary leh Thenzawl DFO Lalbiakchama Chawngthu te, Mizoram Pollution Control Board atangin Dr. Lalramnghaki Pachuau, Scientist B te; Information & Public Relations Department aiawh te, Sub-Hqrs. YMA aiawh leh NHIDCL aiawh bakah Contractors te an tel a. YMA hruaitute chuan leivung paihna bakah hian Company te hnathawh ah a thawh dan tura ruahman ang ni lova hnathawh, tha lo tak tak a awm nia an hriat thu te an sawi bawk a ni.

Comments

Popular posts from this blog