Mizoram Lok Sabha MP hovin Serchhip-ah sawrkar hmalakna thlirhona neih a ni

Serchhip District Development Coordination & Monitoring Committee (DISHA) chu nimin khan Serchhip DC Meeting Hall-ah thukhawmin Serchhip District chhunga Central sawrkar sum hmanga hnathawh hrang hrangte an thlirho.


He thutkhawm hi an Chairman leh Mizoram Lok Sabha MP C. Lalrosanga chuan kaihruaiin DISHA Meeting hi dan ang chuan thla thum dana neih thin tur a ni a. Amaherawh chu COVID-19 hripui vangin hun engemawchen kalpui mumal theih a nih loh thu leh Parliament Session avangin han tawlh deuh a tul chang pawh a awm tih sawiin, nikum Financial Year chhunga November atanga March inkarte, tun Financial Year kal mekah April leh May thla chhunga hmalakna te, kan thlen chin leh kan hmabakte, mamawh belh kan neihte kan en ho dawn thu a sawi a ni.

Nimin-a thutkhawm ah hian Central Sponsored Scheme hrang hrang- MGNREGA, MzSRLM, SPMRM, BADP, PMKSY, SBM (Grameen) leh SBM (Urban), JJM, PMGSY, NFS, NHM, NSAP, SHCS, PMEGP, Samagra Shiksha, PMUY leh NGDRS hmalakna te thlirho a ni a. Hmalak tawh chin leh hmabak an la neihte a changtu Department Officer ten report pein, member kalkhawmten thil pawimawh nia an hriatte sawi zuina an nei a. Hmachhawp la awmte pawh chipchiar takin an thlirho zel a ni.


He huna tarlan a nih danin MGNREGA-ah hian tun sawrkar kum kal mekah ni 36 inhlawhna siam tawh a ni a, Job Cards 15,586 a awm mek a. Pradhan Mantri Krishi Sinchayee Yojana (PMKSY) hnuaiah Central a hmalakna tur Project thehluh zingah Lungkawlh leh N. Vanlaiphai hmalakna tur an rawn pawm hmasaa, hnathawh tan mai tawh tur a ni. Jal Jeevan Mission (JJM) hnuaiah khaw 36-ah hmalak tura kalpui niin an zinga khaw 23 hi 2019- 20 leh 2020-21 ah hma lo lak an ni tawh a, tunah hian khaw 12 dangah te hnathawh chhoh mek niin, khaw dang 1 ah NABARD atanga hmalak chhoh tan mek a ni bawk.

PMGSY hnuaiah hmun 13-a hnathawh zinga hmun 8 chu thawh zawh tawh niin, zawhfel mai tur pakhat a awm a, hmun thumah chak taka hmalak mek niin a dang pakhat erawh chu Contractor a boral avangin dan anga tharthawh leh tura kalpui mek a ni. National Food Security Act hnuaiah hian Serchhip District tan thlatin buhfai, AAY tan quintals 680 leh PHH tan quintals 2295.45, a vaiin quintals 2981.45 lakluh thin a ni a, COVID-19 hripui vanga Central atanga tanpuina PMGKAY hmangin buhfai 2553.80 quintals sem a ni bawk. Pradhan Mantri Ujjwala Yojana hnuaiah Gas connection mi 1383 te pek an ni tawh bawk a. Nikum October atanga kumin May thla inkarah Infant Mortality Rate hi 13.8 a ni a, Maternal Mortality Rate hi 0 a ni.

Nimin-a DISHA Meeting hian 3rd National Water Award, 2020 dawngtu Sialsir khua an lawmpui thu leh hetiang lawmman hlu tak dawng thei khawpa hmalatu Public Health Engineering, Serchhip WATSAN Division chungah lawmthu an sawi a ni.

Comments

Popular News (Last 30 Days)

LPG man bithliah thar