Kumin ah Vankal Solar Park zawhfel tum a ni

Mizoram-a Solar Project lian ber, Power Megawatt 20 pechhuak thei tur Vankal Solar Park chu kumin December thlaa zawh tumin ngawrh takin hmalak mek a ni.

Khawzawl P&E Division-a EE, Er. K. Duhsanga sawi danin, Vankal Solar Park hi kum 2018 atanga bultan niin P&E Department chuan Power dawng thei turin 132/33kV Sub-Station pawh a peihfel tawh a. Kumin September thlaa zawhfel tura ruahman ni mahse COVID-19 hripui leng vangin nakum March thla thleng hun pawhsei sak an ni a, har-satna thleng a awm a nih loh chuan kumin December-ah zawhfel hman tum a ni.

Vankal Solar Park-ah hian tun dinhmun ah Power lakluh leh pekchhuahna tur 132/33 kV SubStation leh Control Room te zawhfel tawh niin Saitual lam atanga 132 kV Line kal pawh 132/33 kV Sub-Station kaltlang tir a ni tawh a. Tunah hian Solar Main Control Room Building sak hna thawh mek a nih bakah 132/33 kV Sub-Station bulah hian Metering Room sa tura hmalak mek a ni bawk.