Kau-Tlabung Mini Hydel Project hungna thubuai ah Court in mi pahnih thiamloh a chantir

Kau-Tlabung Mini Hydel Project hungna hmanrua supply-na sum tihchingpen thubuaiah khatihlaia P&E Department SDO Laldawngliana leh a supply-tu Swopan Kumar Roy chu Special Court (Prevention of Corruption Act)-in thiam loh a chantir a, kum 2 chhung lung in tang tur leh pawisa chawi turin a hrem.

Thudawn danin Kau-Tlabung Mini Hydel Project siamna ah hian a tira sum ruahman atanga sum hman tur tihpun (Revised Estimate) a nih chungchangah thil dik tawklo a awm nia ngaiin October 3, 2008 khan khatihlaia PRISM President Vanlalruata leh General Secretary RL. Liantluanga te chuan ACB-ah FIR an thehlut a, he thubuai hi chhui chian a nih hnuah ACB chuan khatihlaia P&E Chief Engineer Liansanga; SE (Transmission Circle) Lalnunmawia Sailo, SDO Kau Electrical Sub-Division Laldawngliana leh huan hungna supply-tu M/s RP Processing Unit neitu Swopan Kumar Roy te chu thubuai an siam sak a. ACB in thubuai an chhuina Court-a an thehluh hnuah Court chuan Chief Engineer Liansanga laka thubuai ziahluhna chu midang nen inzawmna nei lo a ngaiin a hranga ngaihtuah tura a tih hnuah midang pathum te thubuai chu a ngaihtuah zui a, Lalnunmawia Sailo chungchangah finfiahna a awm lo thung a ni.

He thubuai hi M/S RP Processing Unit, Aizawl ten Thenhlum Kau Electrical Sub-Division-a Huan hungna hlum 66 a supply-na a thil diklo chhuina a ni a, khatih hunlaia Thenhlum Kau Electrical Sub-Division-a awm mi hrang hrang in Huan hungna hi an dawn awm an hriat loh thu an sawi chungin a man tur Rs. 7,26,000/- chu Bill pahnih, Rs. 3,63,000/- ve ve in a Supply tu nia sawi te hnenah Serchhip Power Division atangin pek a ni tho a ni.

He thubuaia thiamloh chantir tak Laldawngliana leh Swopan Kumar Roy te hi Court chuan kum 2 chhung ve ve Lung In tang turin a hrem a, amaherawh chu an tan hun chhung a rei loh avangin danin a phal angin Bail-a chhuah tir nghal an ni a, an chunga Court thutlukna chu High Court-ah ngaihtuah tha leh turin an dil thei a, thla 2 chhunga High Court-ah an kal lo a nih chuan Bail an nihna hi hlihsak a, man nghal tur an ni thung. Hei bakah hian an sum tihchingpen Rs. 7,26,000 chu a zatve, Rs. 3,63,000 ve ve chawi turin Court chuan a ti a, an sum chawi tur hi nimin khan Court-ah an pe nghal a ni.