I&PR Minister in Zirlai chawimawina hun a hmanpui

Aizawl-a Hermon School chuan an School-a Zirlai titha te chawimawina hun nimin khan Aizawl-a Vanapa Hall-ah an buatsaih a, he hun hi I&PR Minister Lalruatkima chuan a hmanpui a ni.

Nimin-a he hun hmanna ah hian I&PR Minister chuan Hermon School hlawhtlinna chu a lawmpui thu sawiin, Zirlaite, Zirtirtute leh nu leh pa te thawhrim rah a nih thu a sawi a, Khawvel thiamna leh finna sang zelah a thiam thiam leh a thei thei dinchanna hmuna rawn chuang chhuak mek zirlai pass thar te chu taimakna leh tumruhna nen hmalam pan turin a fuih a. Zirlaite chu an tumah chiang tur leh chhawrtlak thiamna paw chhuak ngei tura a fuih bakah Nu leh pate thu awih a, chhungkaw tana chhenfakawm, ram tana ‘fa hrin man hla’ nih tum turin a chah a ni. I&PR Minister chuan Central Service-ah Mizo inziaktling zo kan awm ta meuh lo chu pawi a tih thu sawiin, zirlai te chu tumruhna neia mahni State chauh ni lo State dang thlenga rorel phaa awm a tul takzet tih a sawi a, Hnam ang pawhin tanlak a tul takzet tih a sawi bawk.

Hermon School hian kumin HSLC result chhuakah Distinction ah mi 3 leh a pumpuia palina dinhmun hauh pha Lalkrawshlui an nei a. Lalkrawshlui hian Science-ah za-ah za hmuin Subject Topper a ni bawk. HSSLC result chhuakah Distinction-ah mi 3 an inhlangkai a, Political Science Subject Topper Lalrinmawii chuan za zelah 96 a hmu pha a ni. HSLC exam-ah hian an zirlai 54 zinga 53 in an pass a. HSSLC-ah hian an School zirlai zawng zawng an pass vek a ni.