Hmawngkawn-ah Health Clinic Centre hawn a ni

Tuikum bialtu MLA leh Assembly Deputy Speaker Er. Lalrinawma chuan nimin khan a bial chhunga Hmawngkawn khua ah Health Clinic Centre a hawng.

Health Clinic Centre hawnna hunah hian Er. Lalrinawma chuan a bial chhunga Health Sub-Centre awm lohna- Vanchengte, Hmawngkawn, Darlawng, Phulmawi, Chhiah-tlang North leh Mualpui Chhingchhip-ah te sawrkar in Health Clinic Centre dah tura hma a la chu lawmawm a tih thu sawiin, Chief Minister Zoramthanga, Health Minister Dr. R. Lalthangliana leh sawrkar chungah lawmthu a sawi a ni.

Er. Lalrinawma chuan Mizoram-a Sub-Centre awmsa engemaw zatte chu Health and Wellness Centre ah hlan kai an lo tawh tih pawh sawiin, “Kan bial chhunga Sub-Centre te pawh Health & Wellness Centre-ah hian hlankai an ni deuh vek tawh a. Mipuite hriselna atana sawrkar hmalakna hi a lianin a ropui hle a ni,” a ti a. Sawrkar hmalakna kal zelah Sub-Centre la awm lohna hmunah Clinic Centre hawngin hma an la chho leh mek tih sawiin, Clinic Centre a awm theih nana Hmawngkawn khawtlang mipui, VC leh NGO te tanrualnaah lawmthu a sawi bawk.

Hmawngkawn-a Health Clinic Centre hawnna hun hi Hmawngkawn VCP T. Lalrinfela chuan kaihruaiin hemi hmalam hian Buhkang-kawn-ah Health Clinic Centre hawn a lo ni tawh a. Hmawngkawn Health Clinic Centre hawn thar hi Sawrkar inpeih hma chuan MLA Fund atangin Health Worker rawih rih tur a ni dawn a ni.