Facility nei mang lo pawhin tumruhna nen thui tak a thlen theih - Lalduhoma MLA

Serchhip Bialtu MLA Lalduhoma chuan All India Service-a Mizote tlin tam lai khan Facility kan nei tha lo tih sawiin, “Facility nei mang lo pawhin tumruhna nen thui tak a thlen theih,” a ti a, infiamna lama Serchhip Bial in Facility a neih te pawh tih changtlun zel tum a nih thu a sawi.


Serchhip District Table Tennis Association (SDTTA) buatsaih Season Opening Tournament hawnna hun nimin tlai-a Serchhip Venglai a District Table Tennis Hall-a neih khuallian nia a hmanpuina ah he thu hi sawiin Serchhip baltu MLA Lalduhoma chuan Mizote All India Service a kan tlin tam lai khan zirna lamah Facility-ah kan la nei chhe hle tih sawiin, Primary School-ah pawh zirtirtu pakhat chauh nei thei te an nih thu a sawi a, amaherawh chu Facility nei tha lo chung pawhin tumruhna nen thui tak a thlen theih thu leh Facility kan neih ang ang kan hman tangkai a tul thu a sawi a. Table Tennis lamah Serchhip District in Facility a neih te ala beitham hle tih sawiin, Carpet te pawh an mamawh thu leh an Hall panna te pawh siam a tul thu sawiin, kumhlui-a MLA Fund chu an hman zawh tawh thu leh kumthar-ah June thla thlengin Sanction nghah mek a ni tih a sawi a, an mamawh an lo thlen te pawh an hruaitute nen la ngaihtuah zel a nih tur thu pawh a sawi bawk.

Serchhip Bialtu MLA chuan Table Tennis-ah Serchhip District in Junior Level leh a hnuailam ah result tha tak tak a neih laia Youth Level leh a chunglam a result tha a nei mang lo chu zirchianga Senior thlenga result tha nei tura hmalak a ngai tih a sawi a. Naupan lai-a bul kan that chu nakin zela hlawhtlinna atan kan hman a pawimawh thu a sawi a. Infiamna lama Serchhip-a Programme hrang hrang buatsaiha a tel thinna ah District Sports Committee hruaitute inpekna a sang tih a hmuh thu leh infiamna lamah an tui hle nia a hriat thu sawiin, lawmthu a sawi bawk a ni.


Serchhip District Table Tennis Association President Hrilmawia kaihhruai he hunah hian Khualzahawm Serchhip District Sports Association Secretary Vanlalhruaia pawhin sum harsatna avangin infiamna lamah hmalak a harsat hle laia hri leng in ziaawm lam a pan hnua Sports Association hrang hrang ten inelna hun an buat-saih chho mawlh mawlh chu lawmawm a tih thu a sawi a. Sum leh pai chungchangah bialtu MLA Lalduhoma’n Association hrang hrangte nasa taka a lo buaipui thinna ah District Sports Committee te pawh an lawm tih sawiin, infiamna a hlawhtling ni tura midang aia danglam ni tura bei nasa zawk nih tum turin infiammi te a chah bawk.

He hunah hian kum kalta chhunga Serchhip District Table Tennis Association hmalakna te tarlan niin State Level inelna tum 6 neih ah Gold Medal 8, Silver Medal 3 leh Bronze Medal 19 an la a, Serchhip District-ah Tournament tum 4 huaihawt niin Coaching tum hnih an buatsaih a, World Table Tennis Day, April 6, 2021-a hman ah Serchhip chu Mizoram-a District hrang hrangte zingah Table Tennis-a titha ber lawmman hlan niin an Secretary R. Lalzuiliana chu Trainers tha chawi-mawina hlan a ni bawk. Hei bakah hian State player mi 7 nei mekin an Association te nasa tak a puih thin avangin nimin-a he hun hman ah hian Bialtu MLA Lalduhoma chu Tawlhlohpuan an hlan bawk.


Nimin-a he hun hman ah hian kumin April thla a North East Sports neih zawh taka Mizoram tana Table Tennis-a Bronze Medal latu B. Lalruatpuia s/o B. Lalbuatsaiha, Chan-mari Veng Serchhip chu chawimawina thuziak an hlan nghal bawk a ni.

SDTTA Season Opening Tournament-ah hian Category 6-ah inelna neih a ni dawn a, District chhunga infiammi mi 111 tel tura beisei niin naktuk, Inrinni-ah zawhfel hman beisei a ni a. Serchhip khaw pawnlam atangin Thenzawl, North Vanlaiphai, Chhingchhip leh Khawlailung atangin infiammi mi 16 vel tel tura beisei an ni bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar