Latest News

F. Zothanmawia Memorial Football Tournament BORUAK A LIAN TUAL TUAL

F. Zothanmawia Memorial Football Tournament

BORUAK A LIAN TUAL TUAL

- Mapuia Pachuau, Hmar Veng

þ Serchhip Hmar Veng Football Club buatsaih F. Zothanmawia Memorial Football Tournament chu Vawiin hian Semi Final khelh a ni dawn a, a boruak a lian tual tual tih theih a ni.

Serchhip Sports Complex-a khelh F. Zothanmawia Memorial Football Tournament-ah hian Vawiin chhun dar 12:00 hian Semi Final hmasa zawkah Chhim Veng Branch YMA leh Chhekhnai Branch YMA te an inhmachhawn dawn a, Chhim Veng Branch hi Group-A ah awmin Serchhip Kawnpui N Branch nen point 7 ve ve hmuin kawng hrang hrangah intluk zelin Fair Play-ah card an hmuh tlem zawk vanga Group A Winner niin Quarter Final an lut a, Quarter Final-ah Field Veng Branch hneh hramin Semi Final an lut a, Team tha leh tangrual tak niin Final lut turin MPL U-18 Finalist player Omomtea leh an Team experience player Duhzuala te khelh that a pawimawhin an innghahna tia sawi theih tur an ni ang.

An hmachhawn tur Chhekhnai Branch YMA Team hi inbuatsaih tha ber zinga mi niin Gokulam FC Kerela player Rinzuala chu Team Captain-ah hmanga rawn thawkchhuak an ni a. Rinzuala hian Team training atangin a theihtawpin a kaihruai a, Team tha an nihna tilang turin Group C atangin Winner niin ruahsur hnuaia New Serchhip North Branch an draw tih loh chu Team game tha tak leh inkhel hmuhnawm tak min hmuhtir theitu an ni a, Quarter Final-ah Serchhip Kawnpui South Branch 6-1 a hneh thei an nih avangin Champion tura rinkai ber pawl an ni bawk.

Vawiin chawhnu dar 2:00 hian Semi Final hnuhnung zawk chu Vengchung Branch YMA leh P&E Branch YMA ten an khel dawn a, heng Veng pahnih te hi tunhma lam atanga mahni Veng huapa Football Club nei tha niin inkhel hmuhnawm tak en tur a awm a beiseiawm a ni. Vengchung Branch YMA te hi Group B-ah match thum khelha tum 2 chakin chakloh nei lova Quarter Final lut an ni a, Quarter Final-ah Serchhip Kawnpui North Branch si hnih fai-a hneh lehin goal 10 khung tawhin goal 2 chiah an la chhuah a, Santosh Trophy-a Mizoram tana khel phak Johny-a hi an Team innghahna pawimawh tak a nih a rinawm.

P&E Branch YMA hi Serchhip-a Football lama Veng hlun tak niin Group Stage paltlang zo lo mai thei dinhmuna an awm hnuah rawn tlang hramin Quarter Final-ah Team beiseiawm New Serchhip Venglai an hneh leh a ni. An team Captain Bawla bak player langsar nei lem lo mah se ISL Champion Hyderabad FC player Mark-a chu Head Coach Sir OP-a hnuaiah Asst. Coach-in a awm a, hei hian an Team inkhel ah nghawng tha a nei chho zel ni te pawhin a lang a ni.

Comments

Popular News (Last 30 Days)