Dan hnuaiah hma la zel turin bialtu MLA in chah

Serchhip Bialtu MLA Lalduhoma chuan hnamdang (Vai) ILP nei ten anmahni Sponsor-tu hna chauh an thawh theih nan dan hnuaiah dan ang taka hmala zel turin Mizo Cement Mistiri Association (MCMA) Serchhip District chu a chah.

Serchhip-a rawn kal Bialtu MLA Lalduhoma hi Inrinni zing khan Mizo Cement Mistiri Association (MCMA) Serchhip District hruaitute nen inkawmna neiin Mizo Cement Mistiri Association (MCMA) Serchhip District-te chu an hmalakna fakawm a tih thu leh Serchhip Police te nen thawhhona tha tak an neih avangin Serchhip Police-te chungah pawh lawmthu a sawi a. Hnam-dang (Vai) ILP nei ten anmahni Sponsor-tu hna chauh an thawh theih nan Dan hnuaiah hmala zel turin MCMA Serchhip District chu a chah a, harsatna an tawh pawhin an tan a din tlat tur thu a sawi a ni.

Serchhip bialtu MLA chuan, dan diklo-a hnathawkte zawngchhuak zel tur leh an hmalakna engkim hrilh thin tura chah bawkin ILP neilo a hnathawk te man an nih chuan Police hnenah report nghalin, an chungah dan anga hremna pek ngei nise tiin ILP enfiah hi a zing thei ang ber a neih thin nise dan lo anga hnamdang hnathawk an lo tlem deuh deuh theih tur thu te a sawi bawk.