Chief Minister Zoramthanga’n ruihhlo do beihpui puan a ngaih thu a sawi

Chief Minister Zoramthanga chuan ruihhlo do beihpui puan a ngaih thu sawiin, ruihtheihthil in a tihbuaite enkawlna kawnga thawh that avanga entawntlak kan la nih theih thu a sawi.

International Day against Drug Abuse & Illicit Trafficking puala inkhawm nimin-a Assembly House Annex Conference Hall-a neih a hmanpuina ah ruihhlo do beihpui puan a ngaih thu hi sawiin Chief Minister chuan, Khan hrang hrang atangin theihtawp chhuah a beih a tul thu a sawi a. Hemi kawnga hmalakna lo awm tawhte chu fakawm a tih thu sawiin, chutih lai chuan nasa taka beihpui thlak a tul thu a sawi a, ti chin leh ti tan an awm loh nan zirlaite hnenah inzirtirna beihpui ngawrh taka kalpui tul a tih thu leh vantlang mipui ang pawhin theihtawp kan chhuah a tul thu a sawi a. Mizo chu ‘regimented society’ kan nih avangin zirtirna tha nen faina chungchangah pawh nasa takin hma kan lo sawn tawh ang bawkin ruihhlo do kawngah pawh hma kan sawn theih ngei tur thu a sawi a ni.

Chief Minister chuan Sethawn a ruihhlo ngaite enkawlna hmunpui buatsaih mek chu zau taka tangkai taka hman a nih dan tur te sawifiahin, sawrkar department pakhat chauh kut a awm mai nilovin, tanrualna nena tangkai taka hman tura duan a nih thu a sawi a. Ruihtheihthil ngawl vei leh a kaihhnaih harsatna te avangin Mizoram chu langsar mahse, vanduaina chu malsawmna ah chantirin, a do kawngah leh ruihtheih thil in a tihbuaite enkawlna kawnga thawh that avanga entawntlak kan la nih theih thu sawiin, chumi atan chuan kan zavaia kan theih chin theuha rilru nghet tak pu chunga theihtawp kan chhuah a tul thu a sawi bawk.

Nimin-a he hun hmanna ah hian Social Rehabilitation Board Vice Chairman K. Liantlinga pawhin ruihhlo avanga harsatna tawk leh nun tlachhe mek hmachhawn thiam tura inzir a ngaih thu sawiin, Mizoram chu ruihhlo tawlhna kawng pakhat a nih avangin a bawih a tang pawh an tam phahin, ram tichhia in thalaiah harsatna nasa tak a thlen thu a sawi bawk.

He hunah hian ruihhlo do kawnga thawk, Supply Reduction, Demand Reduction leh Harm Reduction-a hma la tha te hnenah chawimawina hlan a ni bawk.