Chhiahtlang HSS result lawmna bialtu MLA in hmanpui

Chhiahtlang Higher Secondary School chuan kumin a Higher Secondary School Leaving Certificate (HSSLC) Exam-a an School atanga zirlai zawng zawng an pass lawmna hun nimin khan an nei a, bialtu MLA leh Assembly Deputy Speaker Er. Lalrinawma chuan a hmanpui a ni.

Chhiahtlang HSS in an School-a an result lawmna an neih ah hian bialtu MLA chuan he School hi a lawmpui thu sawiin, thawktute leh zirlai te in-pekna chu fakawm a tih thu a sawi a. Zirna pawi-mawh zia sawiin, zirna-a hlawhtling turin palen leh patet in awmzia a neih loh thu leh tumruhna leh thawhrimna chu hlawhtlinna bul a nih zawk thu a sawi a ni. Assembly Deputy Speaker chuan Aizawl lama College-ah te seat an chan loh pawhin North East-a College tha ber panga zinga thlan Govt. Serchhip College a awm tih hrereng turin a chah a. An zir chhoh zelnaah thiamna mai bakah nungchang tha leh Zonun zemawi te put zel chu kan hnam dinchhuahna a ni tih hre reng turin a chah bawk.

He School Managing Board Chairman leh Chhiahtlang South VCP R. Lalremchhunga kaihhruai ah hian Serchhip DEO Lawmawma pawhin thu a sawi a, School Principal leh Managing Board Secretary Lalawmpuii Ralte chuan Report a pe bawk a ni.

Chhiahtlang Higher Secondary School hi kum 2014 atanga din niin kum 2017 khan Provissional Permission pek an ni a. October 1, 2022 khan Lump-sum Grant-in Aid ah hlankai ni lehin a din tirh atang hian HSSLC Exam vawi 8 an hmachhawn tawha, a din tirh kum-a zirlai pakhat fail bak fail an la awm lo a ni.