Bialtu MLA in Govt. Serchhip College-ah 'Career Coaching Centre' a hawng

Govt. Serchhip College leh Mizoram Youth Commission (MYC) te tangkawp in Govt. Serchhip College-a 'Career Coaching Centre' an din chu nimin khan Serchhip Bialtu MLA Lalduhoma chuan a hawng a, he Centre-ah hian Batch hmasa berah mi 24 awmin tun thla hian Batch 2-na kalpui tan leh a ni ang.

Govt. Serchhip College-a 'Career Coaching Centre' hawnna hunah hian Serchhip bialtu MLA Lalduhoma chuan he College-a thawktute thahnem ngaihna avanga hmasawnna hmel thar hmuh tur a awm thin chu lawmawm a tih thu sawiin, thiamna chu eizawnna pawimawh ber te zinga mi a nih thu a sawi a, he College in mithiam te ruaia Skill Development an kalpui te pawh lawmawm a tih thu sawiin, tun tuma an hawn tak 'Career Coaching Centre' pawh lawmawm a tih thu leh a hlawhchham tur a ni lo tih a sawi a, “Engemaw sum leh pai ah te harsatna kan nei a nih chuan helai bial enkawltu ka nih chhung hi chuan he Centre hi a hlawhchham lo ang tih lo ring ringawt mai ula, a tul ang zelin kan in pui dawn a ni,” a ti a. Kan tum ber chu All India Service a ni tih sawiin, hemi atan hian tawng lamah nasa zawka hmasawn kan ngaih thu a sawi a. he College in thawktu lam ah ‘Minimum Norms’ phaklo chunga NAAC Grade A a hmu chu a ropui thu leh he dinhmun hi hum zui tura tan lak zel a tul thu a sawi bawk.

Govt. Serchhip College-a Internal Quality Assurance Cell (IQAC) Co-Ordinator Dr. C. Vanlalnghaka kaihhruai he hunah hian Career Guidance and Counseling Cell-a Co-Ordinator Dr. Zarzosanga chuan 'Career Coaching Centre' din tura hma an lakna te tarlangin, he hmalakna hi tunhnaia bultan a nih loh thu leh kum 2014-ah UGC atanga sum hmuh hmanga bul lo tan tawhin, amaherawh chu kum 2 hnu velah a tawp leh tih a sawi a. NAAC Peer Team ten an dinhmun an rawn en tumin Career Coaching Centre hi an ngaih pawimawh zingah a tel thu leh sum harsatna avanga bul erawh an tan mai theih loh thu a sawi a. Bialtu MLA chu dawrin, a hova hma an lak thu leh Mizoram Youth Commission te pawh dawr zui a ni tih a sawi a, bialtu MLA in cheng nuai 2 a pek bakah MYC nen Agreement ziakin Rs. 2,85,000/- hmuh an in beisei thu a sawi a, tunah hian Bialtu MLA in a chi kuitiah sakin an chhawm zel tur thu leh rah tha tak ala chhuah ngei an beisei thu a sawi bawk.

GSC-a Career Coaching Centre-ah hian kumin March thla khan 1st Batch hawngin mi 24 an awm thu leh June 6, 2022 atangin 2nd Batch bul an tan leh dawn thu pawh Dr. Zarzosanga chuan sawiin, tun thlengin mi 42 an inziahluh tawh thu leh hun an la hawn zel thu a sawi a, tlai dar 4:00 atanga zan dar 7:00 thleng Class an kalpui thin thu te, Zirtirtu mi 17 an awm thu leh heng Coaching a kal te atang hian Fee erawh an lak ve thu a sawi bawk a. Hei bakah hian Career Guidance and Counseling Cell te hmalakna hnuaiah Serchhip District-a High School leh Higher Secondary School-ah Career Guidance Awareness neih mek niin tunah hian zirna In 8-ah hun hmang tawhin zirna In 18 an la hmabak thu a sawi bawk.

Govt. Serchhip College-a Career Coaching Centre hawnna hunah hian College Principal PC. Lalremsiama chuan inlawmna thu sawiin, an College-ah hetiang Centre hawn theih a ni ta chu lawmawm a tih thu leh thawktute leh zirlaite pawh an lawm hle nia a hriat thu a sawi a, tunhma lam chuan zirlai ten lehkha an zir a nih chuan an zirchhuah hnuah hnathawh an nei ngei dawn tih an chian thin thu sawiin, tunah erawh hna a van tak avangin thawkrim leh a thei fal ten hlawhtlinna an chan thin thu leh hei vang hian hlawhtlinna chang tur chuan midang aia nasa a beih a pawimawh thu a sawi a, chumi atan chuan he Career Coaching Centre hi a tangkai a beisei thu a sawi bawk.

Nimin-a he hun hmanna ah hian he College-a zirlaite leh thawktute bakah Serchhip Sub-Hqrs. YMA hruaitute, New Serchhip North VC te leh MJA member te an tel a ni.