Mizoram-ah Aam Aadmi Party (AAP) ruangam dinin Member lak beihpui thlak phawt a ni dawn

Mizoram-ah Arvind Kejriwal-a kaihhruai Aam Aadmi Party (AAP) ruangam din tan a ni a, kumthar a Mizoram Legislative Assembly inthlanpui lo awm turah Candidate neia inthlan an hmachhawn nghal dawn leh dawn loh erawh an sawi chiang ngam rih lo.

Mizoram-ah AAP din turin Central-a an hotute chuan Organising Committee rawn dinin, nimin khan Aizawl Press Club-ah thuthar thehdarhtute an kawm nghal a, he hunah hian AAP aiawh hmarchhak bialtu Rajesh Sharma chuan Mizoram-ah AAP din tura Mizo thalai engemaw zatin an ngen hnua AAP ruangam din niin Member lak beihpui thlak tan a nih thu a sawi a. “Arvind Kejriwal kaihhruai AAP hian tun kum sarih kalta chhung khan Delhi-ah hmasawnna lian tham tak tak thawkin, mitin chhawr theih tura Healthcare kalpui a ni te, mipui tana tui thianghlim in tur chhawpchhuah te, mi rethei zawkte tan kawlphetha chhit man a thlawna pek te, thalai tam tak eizawnna siam saka hna a thawh a nih hnuah, Punjab-ah sawrkar tha din leh mek a ni a. Heng zawng zawngte an hmuh hnuah, corruption hluar avanga state hmasawn hlei thei loa awm Mizorama thalai engemaw zatin State-ah AAP din ve turin min rawn pan a ni. Mizoram hian thalaite hna thawh tur siam sak te, zirna In tha leh hriselna kawnga inenkawlna tha an mamawh a ni,” a ti.

Hei bakah hian Mizoram District tinah nimin atanga khan AAP zawm duh tan Member lak beihpui hi thla khat chhung thlak a nih tur thu sawiin, Mizoram mipuite'n State chhungah AAP din an duh a nih chuan Official taka din tan nghal a nih tur thu a sawi bawk.

Organising Committee zing a mi Joseph Biakthianghlima chuan, AAP din turin Mizoram District hrang hrangah hma an lak tan mek thu leh District tinah a tlem berah member 50 an hmuh tlin an mamawh thu a sawi a. Andrew Lalrem-kima pawhin, member atan hian mimal hamthatna leh hlawkna atana kawr-a hman tum erawh an 'welcome' lem loh thu a sawi bawk.

Rajesh Sharma hian, Mizoram mipuiin chuh tura an duh a nih chuan nakum MLA inthlan ah AAP hian General Election an hmachhawn tur thu a sawi a. “Member kan neih tam dan a zir te, Mizoram mipuiin 2023 MLA inthlan chuh tura min duh a nih chuan General Election kan hmachhawn ang. Amaherawh chu, thla khat chhunga Mizoram mipuiin min dawnsawn dan kan thlithlai phawt dawn a ni,” a ti bawk.