COVID-19 hri leng avanga rawn haw, eizawnna khaihlak te tan eizawnna kawng inzirtirna neih a ni

Mizo thalai eizawnna hna thawka State pawna awm, COVID-19 hri leng avanga Mizoram-a rawn haw leh an eizawnna chhunzawm theilo te tana eizawnna peng hrang hrang inzirtirna hun, Livelihood Generation for Returned Migrant Workers due to COVID-19 chu nimin khan Serchhip District-ah neih tan a ni.

He Training hi Serchhip Addl. DC Lalmuansanga Ralte chuan nimin khan Serchhip Tarpi Tlang-a District Panchayati Resource Centre-ah hawngin tun hun zel hi kan hmalam hun siamna a ni tih sawiin, zirna In-a zirtirna thuhmun dawng theuh theuh te pawh kum 2/3 a ral chuan kan dinhmun a lo inthlauh thin thu leh hei hi kan rilru pek dan a inthlauh thin vang leh tih tak tak a ti leh ti ve satliah kan awm thin vang a ni tih a sawi a, hei vang hian he training a tel te chu tuna an hun hman chu tangkai taka hman tum turin a chah a ni.

Thiam thil neih a hlut zia pawh Serchhip Addl. DC chuan sawiin, lehkha sang tak tak zir mah ila sawrkar hna in min daih vek dawn loh avangin thiamthil neih chu a pawimawh thu leh mimal sum senga zir tur tan sum tam tak sen a tul laia sawrkar in senso awm lova thiamthil zirna hun a buatsaih sak chu a hlut zia he huna tel ten an hriat a pawimawh thu a sawi a. Mizo ten In kan la sak zel dawn avang te, Vawksa kan la ei zel dawn nia a lan avang leh ei leh in thianghlim leh changkang kan mamawh zel dawn avangte in tuna training an buatsaih Cement Mistiri, Food Processing leh Piggery te chu a ti tak tak peih tan eizawnna tling a ni tih pawh sawiin, thiamthil neih chu mihringte min ti hlutu, mi tangkai-a min siamtu leh zahawmna min petu bakah min ti huaisentu a ni tih a sawi a, hei vang hian he training a tel te chu tih tak taka ti leh ti tak tak lo kar a hla tih hriaa an damchhung atana mellung pawimawh a ni tih hre reng turin a chah bawk.

Serchhip DC Office-a SDO (Sadar) Lalzikpuii kaihhruai he hunah hian Training Co-ordinator F. Lalnisai SDC chuan he training hi nikum lama neih turin Mizoram Youth Commission (MYC) chuan lo ti tawh mah se Serchhip District-ah COVID-19 hri leng a hluar zui reng avanga neih mai theih a nih loh thu a sawi a. He training hi State pawn lama eizawng, COVID-19 hri leng avanga rawn haw, eizawnna nei mumal ta lo te tan ruahman ni mah se a tel tura an beisei zat hmuh a nih mai loh avangin YMA leh MHIP te phungbawm ah sawmin hetiang mi ni kher lo te tan pawh training hi buatsaih a ni ta tih a sawi a ni.

Ruahman lawk ang chuan he training hi Trade 3-ah neih tur niin Cement Mistiri, Food Processing leh Piggery te a ni a, Cement Mistiri training tur hian Seat 40 awmin SIRD&PR mithiam ten zirtirna an pe anga, Food Processing-ah hian Seat 20 awmin Lalhmangaihzuali, M.Sc (Food & Nutrition) leh K. Lalmalsawmi SMS, KVK North Vanlaiphai ten zirtirna an pe anga, Piggery ah hian seat 20 awmin AH&Vety Department, Serchhip District mithiam ten training an pe thung dawn a ni.

Nimin-a he training hawnna ah hian Er. Lalthlansanga, Core Faculty, Rural Engineering, SIRD&PR chuan Cement Mistiri Training an neih dan tur tlangpui sawifiahin Mistiri hna bakah thil pawimawh hrang hrangte, hnathawktute himna tura thil pawimawh leh Cement Works mai baka hriattur pawimawh dang te an zirtir dawn thu a sawi a. Cement Mistiri Training tura hmeichhia inpe an awm pawh lawmawm a tih thu sawiin, Cement Works kaihhnawih ah Supervisor hna thlengin hmeichhia te tan thawh tur a awm thu a sawi a ni.

Serchhip Sub-Hqrs. YMA President Kawlthuama pawhin he training a tel te fuihna thu sawiin, a bik takin Cement Mistiri mamawhna a san thu leh a awmchhun te an indaihloh em em thu a sawi a, training a tel te chu theihtawp chhuah turin a chah bawk a ni.