Serchhip bialtu MLA in infiammi te theihtawp chhuahpui zel a tum thu a sawi

Serchhip bialtu MLA Lalduhoma chuan COVID-19 avanga rei tak Sports lamah activity kan neih mumal theihloh hnuah tunhnai atangin Displine hrang hrangin tan la lehin hma kan sawn zawt zawt tih a sawi a, a theihna chin chinah theihtawp chhuahpui zel a tum thu a sawi bawk.


Serchhip District Volleyball Association (SDVA) buatsaih ‘Serchhip District Volleyball Championship-2022’ hawnna niminpiah-a New Serchhip Volleyball Court-a neih khuallian nia a hmanpuina ah Serchhip bialtu MLA Lalduhoma hian tunhnaia Serchhip District in infiamna lama hlawhtlinna leh hmasawnna a neih hrang hrangte a sawi a. Volleyball chungchang ah Serchhip District Sports Committee-in Sports Complex ram-a hmun an pek thu leh tuna Youth Recreation Centre, Darnam tlang-a sak mek Top Floor chu Volleyball Court tura ruahman a nih thu te, VC te hmalakna zarah Chanmari leh New Serchhip-ah Court thar tha tak mai kan neih tak thu te sawiin, National Junior Championship 2021-ah kan District hian aiawh pakhat kan thawh thu leh National Referee tling thar mi 2 kan nei tih a sawi a, “Hma kan sawn zel hi a lawmawm tak meuh a ni,” a ti.

Lalduhoma chuan, Badminton lamah District chhunga khaw hrang hrangah Coaching mumal taka kalpui mek niin Junior Level-ah Mizoram-a Record nei tha ber District kan ni tih a sawi a. India National Junior Head Coach, Badminton Association of India General Secretary ni bawk Sanjay Mishra leh Pullela Gopichand te hnuaiah kan District atangin naupang 8 lai Training mek kan neih thu leh Aizawl District ai pawhin kan thawh hlawk zawk tih a sawi a. Tennis lamah Leisekawt-ah Tennis Court nei tharin Mizoram Tennis Association te nena tangdunin Coaching kalpui tura hma lak mek a nih thu a sawi bawk.

Boxing lamah bungrua leh hmanraw thar neiin Coaching pawh nasa lehzuala kalpui mek a ni tih a sawi a, Inter District Championship-ah a zawna Overall Champion ni thei hmasa ber kan nih thu leh tun thla a Kerala-ah Sub-Junior National BoxingChampionship neih turah Serchhip District atangin naupang mipa 4 leh hmeichhia 3 lai Mizoram aiawh turin an kal leh dawn thu a sawi a. Mizoram State Table Tennis Championship 2021-ah Gold 2, Silver 3 leh Bronze 6 leh Mizoram Ranking TT Championship 2021-ah Gold 4 leh Bronze 2 kan lak thu pawh sawiin, “Table Tennis-ah hian Mizoram-ah kan District hian ro kan rel mek a ni,” tiin Junior Level Medal Tally-ah District dang tumahin min tluk ngai lo tih a sawi bawk. Heng bakah hian Football lamah Santosh Trophy North East Qualifier-ah Mizoram Squad-ah Player 2 kan thawh ve thu leh India Super League 2022 Champion Team, Hyderabad FC-ah Serchhip tlangval Mark Zothanpuia a tel thu te pawh bialtu MLA hian a sawi bawk a ni. Bialtu MLA chuan discipline tinah hmasawnna sang zawk nei zel tura duhsakna hlanin, infiammi te chungah beiseina sang tak a nei tih a sawi a, “Kei pawhin ka theihna chinah theihtawp ka chhuahpui zel dawn che u a ni,” a ti bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man