ARC-ah ruihhlo zirhona nei

Foundation For Drug-Free Mizoram chuan niminpiah khan Chhiahtlang-a Adult Rehabilitation Center-ah ruihhlo thatloh zia inzirtirna hun an buatsaih.

‘Ruihhlo tello nun duhawm zawk’ tih thupui-a neitu, Foundation For Drug-Free Mizoram ten Salvation Army enkawl Adult Rehabilitation Center-a he hun an buatsaih hi an pawl President V. Lalnunthara chuan kaihruaiin Dr. PC. Vanlalhlui leh Lalhmingmawia te Resource Person-ah hman an ni a, ruihhlo tih that loh zia leh mihring hriselna atana ruihhlo in taksa a khawih pawi theih dan te a lem nen an entir bakah ruihhlo bawih-a tang mek te pawh Pathian in mahni insiamthatna hun tha a la pekah hian inlamleta nun thar nei turin an fuih bawk a ni.

He hmun enkawltu ARC Superintendent, Captain Anthony C. Lalruatfela chuan he hunah hian inlawmna thu sawiin, an Center-ah hian ruihhlo vanga enkawl mek mi 10 an nei tih a sawi a, an tisa leh thlarau lam mamawh phuhru turin an phak ang tawkin helai hmuna awm te hi an enkawl thu a sawi bawk.