ZPM ten April thla chhunga CT Scan bunfel phut

Aizawl Civil Hospital-a CT Scan khawl bun mek chu nimin khan ZPM Party chuan an Working President K. Sapdanga hovin an tlawh a, he khawl hi tun thla chhung ngeiin bunfel nise an duh thu an sawi.

He hunah hian ZPM Working President chuan tun tum hi he khawl bun mek tum thum an tlawhna a ni tih sawiin, thla ruk (6) zet Aizawl Civil Hospital-ah CT Scan hman theih a ni ta lo chu mi harsa leh rethei zawkten an tawrh nasat thu a sawi a, “Khawl hman lai hi November, 2021-ah a chhia a, chuti chung chuan October 2021-a khawl thar chah thlen chu tun thlengin hman lohin a la awm mai mai a ni,” a ti. ZPM chuan April thla chhung ngei hian he khawl, thla ruk (6) lai hman nghak tawh hi sawrkar hian bun (install) fel ngei se an duh tih pawh sawiin, hemi chhunga installation hi tihfel a nih loh chuan tun aia chak leh na zawka sawrkar nawr an tum thu a sawi bawk.