Bangladesh Commerce Minister rawn zin dawn

Bangladesh Commerce Minister Tipu Munshi chuan tunkar tawp khian zan thum cham turin Mizoram a rawn tlawh dawn a, nimin khan amah lo dawnsawn dan tur hi Commerce & Industries changtu Minister Dr. R. Lalthangliana hovin ngaihtuah a ni.

He thutkhawm ah hian Dr. R. Lalthangliana chuan nikum March thlaa Bangladesh a zin tumin Tipu Munshi nena inkawmhona an neihah Mizoram ramri-a Bangladesh nena insumdawntawna tur Border Trade hmunhma te enho a ‘Joint Verification Visit’ chu May thlaa neih an tinzawn thu leh Covid hripui lengin a zui avanga tih theih ta lo chu, hripui a kiam deuh tak avangin a sawmna angin Joint Verification Visit nei turin Bangladesh Minister chu Mizoram ah a lo zin dawn tih a sawi a ni.

Dr. R. Lalthangliana chuan Lunglei District-a Kawrpuichhuah a Integrated Check Post (ICP) leh Mamit District-a Silsuri a Border Haat te chu Joint Inspection a en an tum thu sawiin, Bangladesh lam chuan helai hmuna insumdawntawnna turin ruahmanna te thui tak an kalpui tawh thu sawiin, “Keini lamah pawh chak takin theihtawp kan chhuah ve a, mahse State in a tih theih chin a awm a, thil thenkhat te chu Central lama Ministry pathum lai – Home Affairs, External Affairs leh Finance te tih tur a ni,” a ti a. Hmarchhak-ah Meghalaya leh Tripura te nen Bangladesh chuan insumdawntawnna an kalpui mek tih sawiin, Mizoram pawhin hun reilote ah insumdawntawnna hi kan kalpui thei dawn niin a sawi bawk.

Ruahman dan chuan Bangladesh Minister leh a hote hian April ni 22-ah Aizawl an lo thleng anga, a tuk April ni 23-ah Dr. R. Lalthangliana hovin Silsuri leh Kawrpuichhuah an tlawh anga, April ni 25-ah Kolkata panin an haw dawn a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar