Serchhip District-a nikum hmasa aiin nikum ah nasa takin Malaria hrik pai an pung

Nikum 2021 chhung khan Serchhip District-ah Malaria hrik pai 45 hmuhchhuah niin nikum hmasa 2020-a Malaria hrik pai hmuhchhuah 18 aiin 27 zetin an tam zawk a ni.


District Vector Borne Disease Control Programme (DVBDCP) Serchhip buatsaiha nikum chhunga Serchhip District chhunga Malaria hrik pai hmuhchhuahna khua-a tlawmngai pawl leh Kohhran hruaitute tana Malaria dona chungchanga pawimawh sawihona nimin-a Serchhip Press Club-a neih ah he thu hi tarlan a ni a. District Consultant Lalchhuanawmi Khiangte kaihhruai he hunah hian District Malaria Officer Dr. Lalngaihawmi Chhangte chuan kum kalta chhunga an hmalakna leh kum hmasa a an hmalakna te tarlangin, nikum hmasa (2020)-ah khan Serchhip District-ah mi 30,279 te thisen enfiah ah Malaria hrik pai mi 18 chiah hmuhchhuah an nih laiin nikum (2021) khan mi 30,323 te thisen enfiah ah Malaria hrik pai 45 hi hmuhchhuah an ni a, nikum a Malaria hrik pai hmuhchhuah zinga 26 te hi PF niin midanga 19 te chu PV an ni a, nikum hmasa ah Malaria vanga thi an awm loh laiin nikum khan mi 2 an thi bawk a ni.

Nikum a Serchhip District-a Malaria hrik pai hmuhchhuah 45 zinga 21 hi Serchhip-a hmuhchhuah an ni a, Thenzawl CHC hnuaiah mi 11 hmuhchhuah ni bawkin East Lungdar leh Khawlailung PHC-ah 4 ve ve, North Vanlaiphai leh Chhingchhip-ah mi 2 ve ve leh Ngentiang PHC-ah Malaria hrik pai mi pakhat hmuhchhuah an ni bawk.

Malaria laka mipuite himna atana inzirtirna pawh kawng hrang hranga neih niin aurinna hmangin vawi 150 au a ni a, tum 15 Awareness Campaign neiin loneitute pawh tum 19 lai an huan leh Lo ah kalchilh an ni a, heng bakah hian Leaflet te semin TV scroll leh Printing hmangin mipui zirtirna te neih a ni bawk.

He sawihona hunah hian Malaria laka mipuite an him theihna tura hmalak dan tur hrang hrangte pawh kalkhawmte hian an sawiho nghal bawk a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar