Serchhip District Hospital building sakna atan P&E Department in an ram an hlan dawn

Serchhip District Hospital sakna tura rawt, Bukpui-a P&E Department ram chu nimin khan P&E Minister R. Lalzirliana chuan tlawhin helai hmun hi Hospital sakna atan pek a nih dawn thu leh dan anga hmalak a nih chhungin Health Department in kut an thlak pawh a rem thu a sawi.

Serchhip District Hospital Building thar sa tura hmalakna kal mekah Serchhip-a tlawmngai pawl hrang hrang leh VC ten damdawi In sakna tur atana an rawt, Bukpui ram hi nimin khan P&E Minister R. Lalzirliana chuan tlawhin he thu hi a sawi a, helai hmuna kalkhawmte hma ah P&E Minister chuan helai hmun hi P&E Department in an hmun-a an lo ngaih leh an ta an tih thin a ni tih sawiin, tunah hian Health Department lam atangin Minister leh Secretary ten khum 100 awmna Hospital atan an dil tih a sawi a. Serchhip-a NGO Coordination Committee ten rilru zau tak pu-a ‘Khawpui chu kan thang zel dawn’ ti-a hetiang ang hmun fal leh tha a sak an remti chu lawmawm a tih thu leh mipuite rilru fakawm a tih thu a sawi a. Tunhma lamin Department tam tak zing ram neih hmang tangkai thei si lo chunga hauh tlat, pawisa nei leh ram hmang tangkai thei Department dang tana hman phal si lo te an awm thin tih pawh P&E Minister chuan sawiin, helai-a an Department ram pawh hi nakin ah chuan an la hmang tangkai ve thei tih a sawi a, amaherawh chu anni chu he hmasawnna thar lo awm tur atan hian an inhawng hle tih a sawi a ni.

P&E Minister chuan damdawi In sakna atan hian cheng vbc. 20 chuang CSR Fund atanga dilchhuah a nih tawh thu leh sawrkar sum tam tak hman ngai lova tih theih lai chuh a ngai nia an hriat thu sawiin, hei vang hian a hmuna thutlukna siam tura helai hmun hi rawn tlawh an ni tih a sawi a. Amaherawh chu kalphung pangngai a awm ve thu leh ram inhlanchhawng tura Cabinet in a pawm ve a ngaih thu a sawi a, chu chu P&E Department atangin Agenda tura an chhawpchhuah tur thu leh tih theih hmasak berah Cabinet in an pawm tur thu a sawi a. Chumi hma pawh chuan an theih chuan Health Department pawhin kut an thlak a remlohna an hriat loh thu a sawi bawk.

He hunah hian Assembly Deputy Spea-ker leh Tuikum bialtu MLA Er. Lalrinawma pawhin helai hmuna damdawi In sa tur hian NGO Coordination Committee leh amah pawhin bialtu MLA a nihna angin hun rei tak ngaihtuahna an lo sen tawh thu sawiin, amaherawh chu a ram ber a fel loh chuan tih ngaihna a awmlo tih a sawi a. Chung harsatna hrang hrang chinfela a awm leh helai hmuna damdawi In sak theih a ni tur chu Serchip District MLA a nih angin District aiawhin lawmthu a sawi bawk a ni.

Serchhip Bukpui ram-a District Hospital sak a nih theihna tura rawtna siam hmasa tu Serchhip NGO Coordination Committee-a Chairman Kawlthuama pawhin khum 100 awmna tur damdawi In sakna tura P&E Department in phal taka an ram an hlan ta chu an lawm takzet tih a sawi a, hemi atana hmalatu te chungah lawmthu a sawi bawk.

Nimin-a helai hmun tlawhna ah hian P&E Department atangin Commissioner & Secretary H. Lalengmawia leh CE Lalbiaksanga te pawh telin Serchhip DC Nazuk Kumar leh Settlement Officer Lalzikpuii te bakah Health Department leh P&E Department hotute pawh an tel bawk a ni.

Box :

  Serchhip District Hospital thar sa tur hian May 27, 2011 khan khatihlaia Chief Minister, Lal Thanhawla khan lungphum a lo phum tawh a, a hmun tura beisei Lawibual ram (Chanmari Veng) chu a remchan loh hnuah harsatna hrang hrang awmin, Serchhip DC hova RKS Governing Body thukhawm in rawtna thlen tura a tih angin Sept. 16, 2020 khan Serchhip NGO Coordination Committee chuan tlawmngai pawl leh Town chhunga VCP te thutkhawm ko in Bukpui ram hi damdawi In sakna atan an lo rawt tawh a, tunah hian Hospital sakna atan hian CSR Fund cheng vbc. 21 hmuh beisei mek a ni.