Serchhip District-ah zirna In 52-ah Sanitary Pads Vending Machine leh Incinerator sem

Samagra Shiksha Serchhip District chuan nimin khan Serchhip Town chhunga zirna In hrang hrangah Sanitary Pads Vending Machine leh Incinerator an semchhuak a, hetiang khawl hi Serchhip District-a zirna In 52-ah sem tur niin hemi rual hian School hrang hrangan Library Books semchhuah nghal a ni bawk.


Nimin a Sanitary Pads Vending Machine leh Incinerator semchhuahna puala Inkhawm Block Resource Centre (BRC) Hall, Serchhip-a neih ah Serchhip District Education Officer (DEO) leh Samagra Shiksha-a District Project Coordinator (DPC) Lawmawma chuan hetianga sawrkar hmalakna tha tak Serchhip District-ah pawh kalpui a ni chu lawmawm a tih thu sawiin, a enkawl zuina ah zirtirtu ten mawh an phur dawn tih a sawi a. Tha taka enkawl a nih loh chuan thil tha tak hi tangkai lo takah kan chhuah ang tih a hlauhawm tih sawiin, a enkawl zui zawngah zirtirtu te an pawimawh dawn thu a sawi bawk. Serchhip DEO chuan Academic Session thar atan zirlaibu sem turte pawh Serchhip rawn thlenpui tan a ni tih sawiin, karleh lamah chuan tifelin sem theih beisei a nih thu a sawi bawk.

Serchhip District Samagra Shiksha Addl. DPC Vanlalchhana chuan kaihruaiin he hunah hian Dy. DPC (E) R. Lalawmpuia chuan he khawl hman dan leh enkawl dan te he huna kalkhawm Zirtirtute chu a hrilhfiah a, Sanitary Pads Vending Machine-ah hian pawisa thir (coin) thlakin a mamawhte hman tur Sanitary Pads a rawn chhuak thei tih sawiin, Incinerator-ah hian hman hnu te chu khawl hmanga tih kanral vek theih a nih thu sawiin, he khawl enkawlna tura pawimawh hrang hrangte a sawi bawk a ni.

Sanitary Pads Vending Machine leh Incinerator te hi Adolescence Health and Hygiene programme hnuaia semchhuah niin Serchhip District-ah Govt. Middle School 33, Govt. High School 18 leh Higher Secondary School pakhat ah a vaiin 52 semchhuah a ni a. Heng khawl hi a lian leh a te awmin Zirlai hmeichhia 50 aia tam awmna ah a lian pein zirlai hmeichhia 50 aia tlem awmna ah a te pek a ni thung.

He hunah hian Govt. Primary School 66, Govt. Middle School 52, Govt. High School 21, Eklavya Model Residential School leh Govt. Higher Secondary School te hman turin Library Books semchhuah nghal a ni bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man