Serchhip District-ah kumin-a thla 3 chhungin CWC in thubuai 21 leh JJB in thubuai 4 ziaklut tawh

Kumin January atanga March thla chhung khan Serchhip District-ah Child Welfare Committee (CWC) chuan thubuai 21 an ziaklut a, Juvenile Justice Board (JJB) pawhin thubuai 4 an ngaihtuah bawk.

Serchhip District-a Child Welfare Committee (CWC) te hian kumin January atanga March thla thleng khan thubuai 21 chu an dawng tawh tih sawiin, heng mite chungchang ngaihtuah hian Sitting pawh vawi 24 an nei tawh tih an sawi a, hemi chhunga an thubuai dawn bakah hian kum kalta December thla-a thubuai chinfel hmanloh 4 awm bawkin, kum kalta December thla atanga kumin March thla thleng khan thubuai 22 chu an chingfel (dispose) tawh a, thubuai la chinfel loh ngaihtuah lai mek 3 a awm a ni. Kum kalta December thla atanga kumin March thla thlenga CWC in thubuai an ngaihtuah ah hian hmeichhia an tam zawk a, Case zawng zawng 25 atangin hmeichhia mi 18 an ni a, hei hi za zela 72% niin mipa 7 an awm bawk a, case chinfel tawh 22 atang hian hmeichhia 17 awmin mipa 5 an awm bawk a ni.

CWC in kumin January atanga March thla chhunga thubuai an dawn 21 zingah hian pawngsual tawk hmeichhia tleirawl 2 awmin, thubuai ziahluh chhan tarlan loh 12 a awm a, mahni chenna atanga tlan bo mi 3 zinga mi 2 chu hmeichhia an ni a. Case 21 an dawn atanga a tam zawk hi hmeichhia niin mi 14 an awm a. District Child Protection Officer (DCPO) Lalsiampuii chuan naupang kum tlinglo chunga pawngsualna thleng, thenawm khawveng inhmaizah tawnna avanga dan anga hmalakna awmlo thin chu thil pawi tak a ni tih sawiin, “A tuartu naupang hma hun kan ngaihtuah tak tak anih chuan dan ang takin pawikhawihtu laka hma lak anih theih nan thuneitute kan hriattir thin tur a ni,” tiin, POCSO Act hnuaiah hre reng chunga zep tum tlat chu hrem theih a nih thu a sawi bawk.

Hetihlai hian naupang kumtlinglo pawikhawih te chungchang ngaihtuahtu, Serchhip District-a Juvenile Justice Board (JJB) te pawhin kumin January atanga March thla thleng khan naupang dan bawhchhiatna thubuai 4 ngaihtuahin heng te hi mipa vek an ni a, kum kalta December thla a thubuai chinfel hmanloh 3 awm bawkin heng te pawh hi mipa vek an ni bawk. JJB hian kumin January atanga March thla chhung khan thubuai 3 an chingfel tawh a, Case chin felloh 4 a la awm a ni. Kumin chhunga naupang dan bawhchhiatna te hi rukruk, ND&PS Act, Motor Vehicle Act leh a chhan tarlan loh pakhat theuh a ni a, kum kalta lamah pawh Juvenile Justice Board hian ND&PS Act kaihhnawih thubuai hi an lo nei zeuh zeuh tawh thin a ni.

Child Welfare Committee (CWC) hian District Child Protection Unit Office, IOC Veng ah kartin Thawhlehni leh Ningani-ah thutkhawm nei thinin a mamawh tan pan theih reng an ni a. Juvenile Justice Board hi thla tin Ningani vawi hnihna leh vawi lina ah an thukhawm thin bawk a ni.