September thla thleng a thlawnin buhfai sem dawn

Sawrkar in a thlawna buhfai a sem thin chu AAY leh PHH te tan kumin September thla thleng sem chhunzawm a ni dawn.

He thu hi Food, Civil Supplies & Consumer Affairs Department changtu Minister K. Lalrinliana chuan nimin-a Rengdil leh Tuidam khua-ah Supply Godown sak thar a hawnna ah sawiin, hrileng avanga mipuite harsatna hriain Sawrkarin a thlawna buhfai a sem thin chu AAY leh PHH te tan kumin September thla thleng sem chhunzawm a nih dawn tih a sawi a ni. Supply Minister chuan Mizoram-in Gas hnianghar tak kan neih theih nan chak taka hmalakna kalpui a ni tih sawiin, nikhat a Truck trip 15 thleng thin kha tunah chuan harsatna dang a awm loh chuan nitin Truck trip 24 kan dawn thin thu a sawi a. Mualkhang Gas Bottling Plant tih changtluna, Gas chhekkhawlna turin hmalakna kalpui a nih mek thu a sawi bawk. 

Supply Minister chuan kumin Furpui hma-in Mizoram chhung Godown 79-ah thla 3 atanga thla 6 tla tur buhfai chhekkhawl a nih thu sawiin, raltlan mi 15,981 te hnenah buhfai quintal 950 lai Sawrkar in tanpuina a pek tawh thu a sawi bawk.

Nimin a hawn tak Rengdil leh Tuidam a Godown hi a dung ft. 50 leh a vang ft. 34 niin buhfai MT 250 leng tura chhut ve ve a ni a, Nov. 20, 2020-ah sa tanin kumin Feb. 25 khan sak zawh a ni a, Staff Quarter chhawng 2 leh Toilet bakah Approach Road-te a keng tel a ni.

Heng building sak hna hi Babie Construction & Consultancy Service (BCCS) Upper Khatla te thawh niin ‘Construction of 21 Warehouses and its related Infrastructures in 07 Districts of Mizoram Under Warehouse Infrastructure Fund (WIF) under NABARD Warehousing Scheme (NWS- 2013-14)’ hnuaia sak a ni a. Mizoram hmun 21-ah Godown leh a kaihhnawih sak nan hian Rs. 39,61,81,000 hman a ni.