NAAC 'A' Grade Accreditation lawmpuina atan Govt. Serchhip College nuai 612 pek an ni dawn

Chief Minister Zoramthanga chuan Govt. Serchhip College in NAAC 'A' Grade Accreditation a hmuh lawmpui nan Administrative Building sak nana an dil cheng nuai 612 chu pek an nih tur thu a sawi.

Govt. Serchhip College in NAAC 'A' Grade Accreditation an hmuh lawmna hun an College hmuna Ningani kaltaa an buatsaih a hmanpuina ah he thu hi sawiin Chief Minister chuan Govt. Serchhip College in NAAC Grade 'A' Accredication an hmu chu a lawmpui thu a sawi a, Zirlaite leh zirtirtute hmalakna leh College Administration tha taka kenkawh a ni tih a thlan thu sawiin, hei hi a bultanna niin hei aia rahbi sang la kal zel tuin duhsakna a hlan a. Serchhip khawpui chuan belhchian a dawl a, a than zelna tur atan sawrkar leh mipui tangrual in hmachhawp tam tak a awm thei tih a sawi a ni. “Pawn lam Mit-ah chuan Garde 'A' hmu thei in ni em tih theih a ni a, amaherawhchu a hmun-a awm chuan College in hmun rem em em mai in nei a, a hmun ngei a rawn tlawhtute Grade 'A' pek tlak ah an ngai a ni,” a ti a, Grade 'A' chunglama hlawhtlinna la awm te nei zel tura duhsakna hlanin, Zirtirtu, thawktu dangte leh Zirlai te an pawimawh em em a ni, a ti a, Govt. Serchhip College in an mamawh em em Administrative Building sakna tura cheng nuai 612 an dil chu Grade 'A' an hmuh lawmpui nan an pek dawn thu a sawi a, Coaching Centre kalpuina tura MYC-a tanpuina an dil pawh an hmuh theih nan alo umzui dawn thu a sawi bawk.

Chief Minister chuan COVID-19 hri leng avanga hun rei tak zirna kalpui mumal theih anih loh hnuin hun tha a inherchhuak tih sawiin, he hun tha kan neih hi kan hman tangkai thiam a pawimawh hle tih a sawi a. Tumruhna neih a pawimawh tih pawh sawiin, khawvel in mi bik nia a sawi te chu mi naran ve mai, tumruhna nei tlat mite an ni tih a sawi a, “Tumruhna nei tlat mite chu an hlawhtling thin tih hre reng chungin chu chuan hlawhtlinna tlang-ah a lawnpui dawn che u a ni,” tiin hmalam pan zel turin zirlaite a fuih bawk a ni.

Govt. Serchhip College in NAAC 'A' Grade Accreditation a hmuh lawmna ah hian Serchhip bialtu MLA Lalduhoma pawhin Mizoram mai nilo, India rampumah pawh Govt. Serchhip College chu a chhuanawm tih thu sawiin, thawktute leh zirlaite chungah lawmthu a sawi a. Career Coaching Centre mumal taka kalpui chhunzawm zel anih theih nan MLA Fund chu engtik lai pawha hman theih a ni dawn tih sawiin, hemi kalpuina atana MYC hnena an mamawh sum cheng nuai 2 pek an ni tur chu lawmawm a tih thu a sawi bawk.

He hunah hian Sports & Tourism Development Board Vice Chairman TC. Pachhunga bakah Serchhip DC Nazuk Kumar leh Higher & Technical Education Department Joint Director Dr. Lalthansangi Fanai te pawhin an lawmpuina thu an sawi a. Dr. C. Vanlalnghaka, IQAC Co-ordinator chuan an hmalakna te tarlangin, he College Principal PC. Lalremsiama chuan tun tum Assessment-ah hian CGPA 3.18 pek an nih avangin lawmthu a sawi bawk a ni.