Hmun hnih-ah Bamboo Link Road kalpui dawn

Adviser to Chief Minister (Technical) Er. K. Lalsawmvela chuan Bamboo Link Road chu Lengpui - West Serzawl leh Tuirial Airfield - Hmar Chaltlang lamah kalpui tur a ni tih a sawi.

Nimin-a Aizawl Mizo Hnam Run-a Chhung Inkhawm neih ah Adviser to CM (Technical) Er. K. Lalsawmvela chuan Bamboo Link Road chungchang hi sawiin Chief Minister Zoramthanga tumruhna leh hrat lak vanga hlawhtling mek a nih thu a sawi a. A tirah Bamboo Link Road concept paper cheng vbc. 965 siam niin Finance Ministry chuan ‘Pilot Project atan cheng vbc. 100 ni phawt se’ tiin Union Budget-ah an dah thu leh he hna hi Pilot Project (enchhinna) a nih angin Ministry lamin an enfiah vek dawn avangin hmun hrang hranga sem darh lovin hmun hnih, Lengpui - West Serzawl leh Tuirial Airfield - Hmar Chaltlang lamah kalpui tur a ni tih a sawi a, hemi atan hian guideline siama nghah mek a nih thu a sawi a. “He Bamboo Link Road hi kan pu phuahchawp a ni a, Peace Bonus hming phuahchawp nen khan a inang chiah a. Phuahchawp rau rauah a tak taka pawisa awm a ni,” a ti.

Aizawl By-pass Road Project chungchang pawh Adviser to Chief Minister (Technical) chuan sawiin, Project hi chi hnih (2) a awm thu leh pakhatna chu Union Budget-a cheng vbc. 500 lo lang, km 40 vel, double lane tur, Lei lian (major bridge) pathum awm tur a ni tih sawiin, Sihhmui - MZU hnuai - Lawipu hnuai - Tlangnuam - Hlimen - Samtlang - Hualngohmun leh Melriat inkarah chhuakin Lunglei Road a pawh tur thu sawiin, tunah hian DPR siam mek niin sanction an nghak tih a sawi a. Aizawl By-Pass Road pakhat hi km 28.9-a sei Sairang chhak Kurung lui kanin Rangvamual ep-ah chhovin leiverh pahnih (twin tunnel meter 9 ve ve-a zau) km 2.40 (Bawngkawn Brigade ruam atanga Muthi ruam thleng), heta tang hian Tuirial Airfield - Seling thlen hmaah a chhuak tur a ni tih sawiin, he hna hi NHIDCL thawh tur a nih thu leh cheng vbc. 715 vel tura DPR siam mek a nih thu a sawi bawk a ni.

Heng bakah hian Bawngkawn leh Vaivakawn-ah Flyover siam turin Feasibility Report pawm a ni tawh tih Adviser to CM (Technical) chuan sawiin, TCIL Company nen MoU ziah tur a nih dawn thu leh tunah hian Law Department vet ngaite nghah mek a ni tih a sawi a. Chaltlang Bus Terminal tur pawh BOT (Built-Operate-Transfer) Project Outsourcing tura ruahman mek a nih thu a sawi bawk.

PWD hnuaia Contractor hna chungchang sawifiahin Adviser to CM chuan, “A Fund lokalna azirin PWD hnuaia Contractor registered nih kher a ngai lo. Kan kawng hnathawktu hnamdang company-te pawh hi Registered Contractor pakhatmah an awm lo,” a ti bawk.