SEDP atan Vaimim chi qtls. 3,000 chawlutin Price support awm thei turin hmalak a ni

Mizoram sawrkar Flagship Programme SEDP hnuaia Vaimim ching tur a thlan te hnenah Vaimim chi quintal 3,000 semchhuah tura ruahman a ni a, Agriculture Minister C. Lalrinsanga chuan SEDP Vaimim tharchhuahte chu Price Support a awm ngei theih nan Central hotute dawr mek an nih thu a sawi.

Tunhnaia Mizoram-a Vaimim chi sem chungchanga thuthar thehdarhtute zawhna chhang a Agriculture Minister C. Lalrinsanga chuan Vaimim chi chu National Agriculture Cooperative Marketing Federation of India Ltd. (NAFED), Hyderabad te siam a ni a, quintal 3,000 (kg 3,00,000) chawkluh niin, loneitu pakhatah kg 20 (bag 1) zel, hectare 1- a chin tur a pek an ni a. Vaimim chi chu kg 1-ah Rs. 143.50 vel zel sengin NAFED, Hyderabad atangin Mizoram-ah chah thlen a ni.

Agriculture Minister chuan thlai chi a intodelh chu tha a tih thu sawiin, “A bul tan nana Vaimim chi tha rualkhai a dawn tlan anih theih nan ruahmanna kalpui a ni,” a ti a, tualchhung atangin rampum huap a sem khawp a awm a rinawm loh thu leh supply tluantlin loh palh a hlauhawm thu sawiin, hemi vang hian theihtawp chhuahin kuthnathawktu ten a hun-a an chin hman turin State pawn a mi an chawlut tih a sawi a ni.

Vaimim chingtute tharchhuah chu a hralhna chungchang lam pawh ngaihtuah a ni tih sawiin Agriculture Minister chuan, Ministry of Agriculture & Farmers Welfare hnuaiah Market Intervention Cell an awm tih a sawi a, chuta an hotupa Binod Giri, Asst Commisioner pawh hemi chungchang hi sawipui tawh niin, indawrna tluang takin a kal mek a, Price Support a awm ngei theih nan beiseina sang tak a nei tih sawiin, hei hi a hlawhtlinna hmuh a nih chuan 75:25 in Price Support kalpui theih a beiseiawm tih a sawi a, Mizoram chhunga a market lo buaipui tur hian MIZOFED leh MAHFED hman theih a rinawm tih a sawi bawk.

Ruahmanna ang chuan Agriculture Department hnuaiah SEDP Vaimim leh Bekang dawng tur mi 20,000 thlanchhuah phawt an ni tih Agriculture Minister chuan sawiin, chung zinga mi 5,000 te chu Fu leh Leilet (WRC) kalpui tur atan siamrem an nih thu a sawi a,WRC bikah hian Bê (pulses) lamah India ram indaihlohna a nasa in Mizoram-ah pawh mamawhna a sang a, Be lam chi Lentil Dal, Rasma, Behliang Dal leh a dangte chin pun kawngah hmala tel turin ruahmanna an nei tih a sawi bawk.