Mizorama chengte chu mahni taksa hriselna uluk zawka inchik mamawh kan ni - Health Minister

Health Minister Dr. R. Lalthangliana chuan Mizorama chengte chu mahni taksa hriselna tun aia uluk zawka inchik mamawh kan ni tih a sawi.

India ram hmundangte ruala buatsaih Hriselna Kutpui (Block-Level Health Mela) Aibawk RD Block tana Sialsuk khuaa nimin a neih a hmanpuina ah he thu hi sawiin Dr. R. Lalthangliana chuan sawrkar laipuiin mipuite, a bik takin khawpui lian a cheng ve lote hriselna a ngaih pawimawh em avangin India ram pumah Block-Level Health Mela neih turin ruahmanna a siam chu lawmawm a tih thu leh kan chhawr tangkai ngei a tul thu a sawi a. Mizorama chengte chu mahni taksa hriselna tun aia uluk zawka inchik mamawh kan ni tih sawiin, natna kan neih kher nghak lova kan taksa hriselna dinhmun kan ngaihven reng hi a pawimawh a, kan hriselna hi kan hmalam hun hriltu pawimawh tak a nih avangin ka hriselna atana pawimawh inenkawl uluk te, ei leh in hrisel, mut hunbi mumal neihte bakah taksa insawizawite hi mitinin harsa lo taka kan tih ve theih a ni, a ti a. Kan hrisel tha emaw kan tih lai pawh hian hunbi neia inentir ching ila, nat hrep tawh hnua damdawi in pan ngai thin hi engemaw chen chu kan pumpelh thei ang, a ti bawk.

Health Minister chuan ZMC tihlenna tur hmalakna kalpui mek a nih thu pawh sawiin, PM Ayushman Bharat Health Infrastructure Mission hnuaiah khum 50 awmna Critical Care Block siam a nih tur thu leh Champhai-ah hetiang bawk hi dah a nih tur thu a sawi a. Sialsuk-ah damdawi In cheng vbc. 2 senga sak chu reilote ah zawhfel a nih tur thu sawiin, Sialsuk PHC hnuaia Sub-Centre 3, Lamchhip, Samlukhai leh Sumsuih te chu Health & Wellness Centre ah hlankai an nih thu a sawi a, thawktute indaihlohna phuhru turin tan an la reng tih a sawi bawk.