Ram thenawm nen ramri-a insumdawn tawnna atana hmalakna C&I Minister in House a hrilh
Zokhawthar-a Land Customs Station chu sawrkar laipui atanga sum an hmuh cheng nuai 1,500 hmangin tih changtlun tum mek anih thu Commerce & Industries Minister Dr. R. Lalthangliana chuan House a hrilh a. Indo-Bangladesh insumdawntawnna atan pawh hmalak mek a nih thu a sawi bawk.
Nimin-a Assembly Session-ah MNF Member Dr. ZR. Thiamsanga’n Indo-Myanmar Border Trade Point, Zokhawthar-ah Formal Trade kalpui tura sawrkar hmalakna a zawhna chhangin Commerce & Industries Minister Dr. R. Lalthangliana chuan Indo-Myanmar Border Trade Point, Zokhawthar-ah sawrkarin chak taka hma a lak thu a sawi a, Central sawrkar atangin Special Central Assistance to States under Capital Expenditure atangin cheng nuai 1,500 an hmuh thu leh he sum hmang hian Land Customs Station. Zokhawthar chu Infrastructure tichangtlung tura Project siam a ni tih a sawi a. Immigration Check Post, Animal Quarantine Station, Plant Quarantine Station Laboratory, Food Testing Laboratory atan building awmsa thuamthat, Weight bridge siam that, Ware House siam that bakah, Officer leh Staff quarters te sak tura ruahman a ni tih a sawi a, Contractor tur pawh an thlan fel tawh thu leh Mobilization of works kalpui mek a nih thu a sawi bawk. Thenawm ram Myanmar in dan anga insumdawn tawn nana hma a lakna chungchangah C&I Minister chuan an hmuh theih chinah chuan Myanmar sawrkar hmalakna hmuh tur a tam loh thu a sawi bawk.
Bangladesh Trade atana buatsaih, Integrated Check Post, Kawrpuichhuah atana hmalakna te zawhna pawh chhangin Dr. R. Lalthangliana chuan India leh Bangladesh Border-a Integrated Check Post, Kawrpuichhuah-ah hian fencing atan Land Preparation tih zawh thawkhat niin Fencing Post phun tura hmalak mek a nih thu a sawi a. A Project pumpui design pawh peihfel a nih tawh thu leh DPR pawh Land Port Authority of India in a pawm fel tawh bawk tih a sawi a, Forest Clearance atan Revenue Department in hma a la mek tih a sawi bawk.
Indo-Bangladesh nena insumdawn tawnna atana ruahman pakhat, Silsuri Border Haat atana sawrkar hmalakna te pawh Commerce & Industries Minister chuan sawiin, Mizoram sawrkar chuan Indo-Bangladesh Border Haat atan Pilot Project-ah Silsuri (Mamit District) a ruahman thu leh lehkha pawimawh zawng zawngte pawh thawnthlak a nih thu a sawi a. Sawrkar laipui hian Bangladesh sawrkar remtihna (formal approval) la turin hma an la mek tih sawiin, “Bangladesh sawrkar hian min phurpui khawp mai,” a ti bawk.