Hospital atana thlan-ah mimal ram pek duhlo

Serchhip Thalai Pawl (STP) chuan Serchhip District Hospital sakna atana thlan tawh Bukpui ram-ah mimal tana Pass pe lo turin Serchhip-a Settlement Officer chu an ngen.

STP hian Serchhip District Hospital building thar sakna tur atana lo thlan tawh ram ruak, Chhiahtlang South VC huamchhunga Bukpui ram chu mimal tute'n emaw ram atan neih tumin hma an la nia an hriat thu sawiin, hetianga khawtlang tana tangkai taka hman tum mek a nih lai a mimal hamthatna lak tumna ni awm tak thawm an hria chu pawi an tih thu leh thalo an tih thu an sawi a. Hei vang hian nimin khan Serchhip-a Settlement Officer hnenah helai hmun ah hian mimal tana pass pe lo tura ngenna thehlutin, a copy pawh sawrkar hotu dang te an pe nghal a. RTI hmangin he ram dinhmun hi phawrh chhuah vek an tum thu leh dik lo tak leh mimal hamthatna lak beiseia hma la an awm zel chuan a tawp thlengin an do zel dawn tih an sawi bawk. STP chuan nakina Serchhip Distict-in Hospital tha leh changtlung zawk kan neih zui zel theihna atan Bukpui ramah hian District Hospital building thar hi sak ngei nise an duh thu pawh an sawi nawn leh bawk.