Eng hna pawh thawk ila, hlawhtling tur chuan daihrei leh tlo a ngai - Dr. R. Lalthangliana

Zonuna Kawlni (LENKAWL) • March 2, 2022 • Comments • Mizoram

Commerce and Industries Minister Dr. R.Lalthangliana chuan eng hna pawh thawk ila, hlawhtling tur chuan daihrei leh tlo a ngai, a ti.

Mizoram Handloom & Handicrafts Development Corporation Ltd. (ZOHANDCO) buatsaih State Handloom Expo hawnna nimin-a Millenium Centre Roof Top Exhibition Hall-a neih a hmanpuina ah he thu hi sawiin Dr. R. Lalthangliana chuan Handloom lama eizawngtute tan pawh hlawh-tlinna tak tak chang thei tur chuan daih rei leh teirei peih a pawimawh tih a sawi a. Hripui leng vanga Mizoram inkharkhipin Handloom-a eizawngtute a vawchhe nasa hle tih sawiin, chutihrualin, kuminah nunphung pangngaiin kan nung leh tan ta a, Puantah-a eizawngte tan pawh kawl a eng leh tan tih a sawi a. Tualchhung market chauh ngaihtuah lova, State dang leh ram pawn thlenga thawnchhuah tlak quality tha siam tura fuihin, Mizoram-a thilsiam chhuah te ramdanga thawnchhuah dan tur SEDP Board pawhin a ngaihtuah mek tih a sawi a, Handloom leh Handicraft lama eizawngtute pawh an ngaihtuahna ti zau turin a fuih a ni.

Dr. R. Lalthangliana chuan sawrkar anga tih theih awm apiangah tlanchhiat an tum loh thu pawh sawiin, Handloom leh handicracft chu SEDP anga kalnat theihna kawng tur nia a hmuh thu leh sawrkarin theihtawp a chhuah dawn thu a sawi a, kumin-ah hian bung thar an kai theih ngei a beisei thu a sawi bawk.

He hunah hian ZOHANDCO Chairman C.Lalrammawia chuan ZOHANDCO chungchang sawiin kum 1988 a din a nih thu leh kuthna-thawktuten malsawmna an dawn theihna atana tanpui tura din a nih thu a sawi a. Aizawl tiamin District tinah State Handloom Expo neih a nih tawh thu te, Aizawl leh Lawngtlai-ah National Handloom Expo buatsaih a nih thu te, Vendor Development Programme (VDP) leh Seminar pawh District pali-ah an neih tawh a nih thu te a sawi bawk.

Chawlhkar hnih awh tur he Handloom Expo hi March ni 15-ah khar a ni dawn a. Mizo kutchhuak - Puan, Kawr, Ipte, incheina chi hrang hrang leh thiam hnang deh lam hawi te phochhuah a ni a, Stall 36 a siam a ni.