Thenzawl-ah Wellness Centre hawn a ni ta

Ministry of Tourism Scheme, Integrated Development of New Eco Tourism Destination under Swadesh Darshan – North East Circuit at Thenzawl & South Zote, District Serchhip & Reiek Mizoram hnuaia sak Thenzawl Wellness Centre chu nimin khan Tourism Minister Robert Romawia Royte chuan a hawng.

Tourism Department Director V. Lalengmawia kaihhruai Thenzawl Wellness Centre hawnna hunah hian Tourism Minister chuan Tourism Department chu department lian lo tak ni mahse hmalakna hmuh theih tawh leh hmuh theiha awm chho mai tur engemawzat an nei tih sawiin, Tourism tihhmasawn nana hmachhawp an neih langsar zualte a tarlang a; Vantawng Khawhthla chu Northeast Mega Tourism hnuaia tihhmasawn tur thlan a nih thu leh  Thenzawl-ah Tourist Auditorium hawn mai hmabaka peih fel a nih tawh thute a tarlang a. Covid19 hripui a kiana hun tha a awm chuan tun February thla hian Ministry of Tourism bul tumin Golf Tournament, Thenzawla buatsaih tum a nih thu a tarlang bawk. 

Robert Romawia Royte chuan, Reiek tlang thuamthatna tura DONER Fund atanga cheng nuai 560 hmuh anih thu te, Beraw Tlang Resort tihchangtlun nana Special Assistance to State for Infrastructure Development atanga cheng nuai 600 hmuh a nih thu te, 15th Finance Commission hnuaiah pawh Mizoram Tourism tihhmasawnna tur cheng vbc. 200 dah a nih thute tarlangin, 15th Finance sum erawh hi chu hripui vangin kan beisei ang zat kan hmu lo mai thei a, kan ngaihpawimawh zualte erawh kan hmuh ngei beisei a ni, a ti. Heng bakah hian Khamrang Village Based Eco Tourism atan DONER atanga cheng nuai 800 approval hmuh a nih thute leh External Aided Fund atanga cheng nuai 100,000 (cheng vbc. 1000) an beisei mek thu a tarlang bawk.

Minister hian Tourism hmasawnna tur ruahmanna lian tak tak sawrkar chuan a duang chho zel dawn tih sawiin, khualzin hipna kawngah Mizoram hi chawikan dawrh kan tum tlat a ni, a ti a. Tourism hi amah ngawta hmasawn thei a ni lova, department dangte leh mimal hmalaknate nen thlenga thawhho ngai a nia, mipui rilru sukthlek pawhin a zir a tul hle bawk a. Thenzawl phei chu Tourist hmunhma tam tak awmna a ni a, mikhual chitin dawng thei leh enkawl thei ni tura in inbuatsaih zel a ngai a ni, tiin a chah a ni.

Wellness Center hawnna hunah hian Tourism, Sports & ICT Development Board Vice Chairman TC. Pachhunga pawhin thu sawiin, tuna hawn tak, Wellness Center chu Mizoram-a la awm ngailo a ni tih sawiin, hetiang kan nei tur chu ropui a tih thu leh Thenzawl khua pawhin an vanneih zia an hriat a pawimawh thu a sawi a, malsawmna dang pawh Thenzawl tan ala thlen belh zel tur thu a sawi bawk. Mizoram Tourist Map-ah Thenzawl chuan hmun pawimawh tak a luah thu pawh sawiin, hmun pawi-mawh tak tak 10 chuang a awm thu a sawi a, mikhual avanga Thenzawl khua in buaina an tawh chu khualzin tam zawk an luha tihbuai nasat lehzual an tum thu a sawi a. Mihring nun ti nuamtu nungcha humhalh kawngah nasa zawka hma lo la turin Thenzawl khaw-tlang hruaitute chu a chah bawk.

Nimin-a hawn tak Wellness Center hi Then-zawl Golf Resort nena hman dun theih tura duan niin Thenzawl tlawhtu ten an hman tangkai beisei a ni a, Integrated Development of New Eco Tourism Destination under Swadesh Darshan – North East Circuit at Thenzawl & South Zote, District Serchhip & Reiek Mizoram hnuaia sak niin Wellness Centre atan bika ruahman sum chu cheng nuai 1037.69 a ni a, Edufice Infraservices Pvt. Ltd ten January 2019 ah a sak hna hi an tan a, Hripui leng vangin a hawn hun hi tum hnih zet sawn hlat a ni tawh a. Helai ram hi acre 2-a zau niin Spa leh Massage Room te, Cafeteria eh a riahchilh duh tan Eco-Log Hut pariat (8) a awm a. A sak nan hian Siberian Pine Wood vek hman a ni bawk.