Serchhip District-a hri kai nasa taka pun chhan Hunpui lai-a CAB zawm that loh vang ah ngai

Serchhip District Bawrhsap leh Serchhip District Disaster Management Authority Chaimran Kumar Abhishek chuan tunhnaia Serchhip District-a COVID-19 hri kai nasa taka an pun chhan chu hunpui laia COVID-19 laka himna dan kan zawm that tawk loh vang a ni ber tih sawiin, mipuite chu tha taka CAB zawm turin a chah bawk.

Nimin khan Serchhip DC Meeting Hall-ah Serchhip District Disaster Management Authority chu sawm bik mi pawimawh dangte nen thukhawmin Serchhip District a COVID-19 hrikai pung chak lutuk dolet dan turte leh Serchhip khawpui chhunga dawr inhawn chhawk chungchang te an sawiho a. He hunah hian Bawrhsap Kumar Abhishek chuan Serchhip District a nitin Sample Test zat atanga COVID-19 punna rate chu za zela sawmthum (30%) zet a tling tih sawiin, “Aizawl District dawta Case tamna ber kan ni mek bawk a, tun ang renga kan pun chhoh chuan reiloteah Aizawl District hi kan lehpel dawn a ni,” a ti a. Heti taka hri kai kan pun chhan hi hunpui laia COVID-19 laka himna dan, COVID-19 Appropriate Behaviour kan zawm that tawk loh vang a ni ber tih sawiin, “Kan dinhmunin chhiat lam a pan zel loh nan mipuiten himna dante tha taka kan zawma, khauh taka dan kan kenkawh a tul a ni,” a ti a. Kan himna tur dante mipuiten kan zawm tha thei ta lo a nih chuan hmalak lehna tur awmchhun chu Lockdown a nih mai hmel tawh a ni, tiin himna dante tha taka mipuiten kan zawm a tul takzet tih a sawi bawk.

He hunah hian Serchhip khawpui chhunga sumdawnna hmun leh Dawr hawn dan tur chungchang sawiho niin Serchhip khawpui chhunga dawrte inhawn chhawk tir ai chuan CAB khauh taka kengkawh chunga nitin dan pangngai-a inhawn tha zawkin an hria a. Hei hi dawr inhawn chhawkah dawr inhawng chhunah mipui an lutkhawm nasa zawk nia Bazar leh a chhehvel VLTF aiawhte leh sumdawng pawl aiawhten an hmuh vang a ni ber a. Hei vang hian khauh taka CAB kenkawh a, CAB zawm thalo dawrte chu kar hnih chhung khar sak mai zawk nise ti-a rel a ni a. Dawr neitute chuan anmahni dawrtuten Mask tha taka hreng chung leh kut sil/sanitized ngei chauhvin indawrna an neih pui thin tur a ni a, dawrtu leh dawr neituten CAB an zawm leh zawm lohvah dawr neituten mawh an phur dawn a ni.

Khawi hmunah pawh mipuiten CAB an zawm that theih nan Incident Commander te chu tun aia nasa lehzuala hma la tura beisei an ni a, Police Department chu ngaihhnathiamna tel lova dan kengkawh (Zero Tolerance) tura beisei niin, VLTF te pawh intuaithara anmahni huamchhungah khauh taka hma lo la thar leh tura beisei an ni a. Kohhran hrang hrangte pawh CAB zawm tha tura beisei tharleh an ni bawk.

Hei bakah hian COVID-19 hri kai nia hriat zingah mahni inenkawl dam tum, test pawh nei duhlo, inthup an awm nia sawi chungchangah mahnia inenkawl dam tumten vanduaina leh harsatna khirhkhan zawk an tawk nasa tih Medical lamin an tarlang a, Test neih thuaia Doctor te enkawlna hnuaia luh thuai a him ber tih mipuiten hre tlang turin an ngen a. Vaccine la duhlo, hri kaiten an tuar nain an dinhmun a him lo bik hle a ni tih finfiahna te pawh sawi chhuah a ni.

Nimin zing thleng khan Serchhip District ah COVID-19 hri kai 946 an awm mek a, kumin kumthar hnua ni sawm chhung mai hian COVID-19 hri kai hmuhchhuah tam ber ni hi tum thum ngawt a thleng chho a. Tunah hian khaw 11 chu hmun khuahkhirh bikah puan mek an ni bawk.

Nimin-a thutkhawm ah hian Serchhip District Disaster Management Authority-a Member te bakah Serchhip Town chhunga Incident Commander te, DIPRO, SDPO leh tlawmngai pawl hrang hrang aiawhte leh sum-dawnna hmun huamtu VLTF aiawh te, sum-dawng pawl aiawh te, thuthar thehdarhtute an tel bawk a ni.