Chanchin lawrkhawm :

Mizoram-ah Omicron la hmu lo

Mizoram-a COVID-19 hri kai tawh te Sample Genomic Sequencing tura thawn tawh zinga tun-hnaia Variant thar, Omicron hmuh ala ni lo tih IDSP Nodal Officer Dr Pachuau Lalmalsawma chuan a sawi a, tunhnaiah Foreign atanga rawn haw mi 242 an awm tawh thu leh heng mite hi ni 7 quarantine hnuah RT-PCR hmanga sample test sak an ni tih sawiin, positive 16 hmuhchhuah tawh niin sample test hmabak mi 29 an la awm thu a sawi a. Tunhnaia Mizoram pawn atanga rawn lut zingah chawhrualin nitin COVID-19 positive 38 hmuhchhuah ang a ni tih a sawi bawk.

Vaccine pechhuak mek zel

Inrinni thleng khan Mizoram-ah COVID-19 vaccine Dose 13,82,340 pek a ni tawh a, Vaccine la thei atanga chhutin 1st dose la hi 95.5% leh Full Dose la hi 79% an ni a. Kumin January ni 3 atang khan kum 15 - 17 inkarte tan COVID-19 vaccine ‘COVAXIN’ pekchhuah tan niin, pek tur zat ruahman mi 67,000 atangin mi 38,409 in 1st dose an la tawh a, ni 28 hnuah 2nd dose pek leh tur an ni. Precautionary Dose hi Health-care Workers, Frontline Workers leh kum 60 chunglam natna benvawn nei, an Doctor ten la tura an tih te hnenah Janury ni 10 atang khan pekchhuah a ni a, mi 5480 hnenah pekchhuah tawh niin, Precautionary Dose hi 2nd dose lak atanga thla 9 hnuah lak leh tur a ni.

Kolasib NGO in ngen tum

Tunhnaia Kolasib District Bawrhsap sawn tura Order tihchhuah a nih chungchang ngaihtuaha Inrinni zan-a Kolasib a tlawmngai pawl hrang hrang (All NGO) hruaitute Kolasib Sub-Hqrs. YMA Office-a thukhawm chuan Assam leh Mizoram ramri leh COVID-19 a hmalakna neih mek laklawh takte avangin hun engemaw chhung chu Kolasib DC transfer order hi tih khawtlai sak turin Chief Minister leh Deputy Chief Minister te hnenah ngenna thlen nise an ti. Tarlan tawh angin Champhai-a NGO te chuan Champhai DC Transfer Order hi sut leh an phut thung a ni.

BJP in Larsap hnenah thlen

BJP Mizoram Pradesh hruitute chuan Inrinni khan an President Vanlalhmuaka hovin Mizoram Larsap Dr. Hari Babu Kambhampati chu Raj Bhavan-ah hmuin Mizoram chhunga hmasawnna hna hrang hrang thawh mek te, Mizoram chhunga PM Schemes kalpui a nih dan te leh Mizoram chhunga Smuggling, a bikin dan lova Kuhva ro a sumdawnna nasa lutuk te an sawipui a. Larsap chuan an thu thlen te chu enzuiin a tul anga hmalak ngei a tum thu leh Documents pawimawh an neih te pawh a kutah pe ve tur leh amah ngei pawhin hma a lak tur thu a lo hrilh a ni.

ZPM in Press mi te kawm

ZPM hruaitute chuan Inrinni khan an Party Working President K. Sapdanga hovin Cham-phai-a thuthar thehdarhtute kawmin tun thla ni 13-a Mizoram sawrkar in Senior Officer thenkhat a siksawi zingah Champhai DC leh Kolasib DC te chuan ngaihven an hlawh fal tih an sawi a, “Transfer chhanah hian thil dik lo inthup lian tak inphum a awm ngeia mipuiten an hriat vang a ni,” tiin thuneitute lungawi lo inhrosakna ni ngeia a lan thu an sawi a, “Sawrkar tha lo hnuaiah chuan dik tak leh tha taka thawktute an chep a, Sawrkar kawng daltuah ngaih an ni thin,” a ti bawk.

MPYCC in SEDP sem phut

Congress Thalai, Mizoram Pradesh Youth Congress Committee (MPYCC) chuan MNF Party-in sawrkarna an chelh atanga kum thum ah pawh mipui hnena sem tura an intiam SEDP chu an la sem lo tih Zirtawpni khan thuchhuah siama tarlangin, “Mizorama rorellai MNF sawrkar hian kum 2018 inthlana an intiam ang ngei khan, Mizorama sawrkar hnathawk lo chhungkaw tinte hnenah Socio-Economic Development Policy (SEDP) hnuaia Cheng nuai thum sem an intiam hi sem ngei rawh se,” an ti a, “Nimin maia MNF MLA inhmukhawmten SEDP semchhuah chungchang an sawi hi mipui-a an intiam a nih angin, a taka hmuh tur a awm ngei kan phut tlat a ni,” an ti bawk.