Enkawllai 1446 la awm mek

Serchhip District-a COVID-19 hri kai hmuh te zingah mi 1446 te enkawl mek an la ni.

Nimin khan Serchhip District-ah COVID-19 hri kai mi 32 hmuh belh leh an ni a, heng hri kai hmuh te hi Rapid Antigen Test hmanga hmuh niin an address kimchang erawh hriat a ni rihlo thung.

Inrinni khan Serchhip District-ah hri kai mi 62 zet hmuhchhuah an ni a, TrueNat Laboratory-a Sample enfiah 14 atangin hri kai 4 hmuh niin an vaiin Serchhip khawpui chhung ami te vek an ni a, FIA Test hmanga Sample enfiah 79 atangin hri kai mi 19 hmuh niin an vaiin Thenzawl khua vek an ni. Rapid Antigen Test hmanga Sample enfiah 354 atangin hri kai mi 39 hmuh leh an ni bawk a, an zinga 16 te chu East Lungdar khua niin Lungpho-ah 11, Zote South-ah mi 6, Ngentiang-ah mi 5 leh Serchhip ah hri kai mi pakhat hmuh an ni.

Serchhip District-a hri kai te zingah In-rinni khan mi 43 te enkawl dam niin nimin khan mi 186 te enkawl dam an ni ve leh a, heti hian nimin tlai thleng khan Serchhip District-a hri kai hmuhchhuah tawh chu 7872 niin an zinga 6403 te enkawl dam an ni tawh a, hri kai enkawllai 1446 la awmin hri kai mi 23 an boral tawh a ni.