Ni 17 Vawk thi awm tawh lo

Mizoram-a Vawk pul hri leng, African Swine Fever (ASF) chuan reh lam a pan zel a, nimin thleng khan a zawnin ni 17 chhung chu ASF vanga Vawk thi chhinchhiah a awm tawh lo.

Nikum March ni 21 atanga Mizoram-ah a leng tan tih hriatchhuah ASF vawk pulhri hi Mizoram District zawng zawnga khaw 272-ah lengin, Vawk 29,824-in an thih phah tawh a, hri darh tur venna atan Vawk 10,381 suat a ni tawh bawk.

He Vawk pulhri hi Lunglei District-a Bangladesh ramri dep Lungsen khua atanga leng tan a nih avangin thupek bawhchhia a Bang-ladesh atanga Vawk leh Vawkte lakluh vanga darh a nih ringin Police Special Investigation Team (SIT) pawh din a ni a. Mahse, Serchhip District-ah ASF hri kai Sanghal thi hmuh a nih tak avangin Sanghal-in an rawn putluh a nih an ring leh ta zawk a ni.

Hetiang a nih lai hian Vawk hri leng ASF hi tun thlengin chhiatna ‘Disaster’ ah puan a la ni lova, hei hi sawrkar sum harsatna tawh mek vang ni a sawi a ni. Hetihlai hian AH&Vety Department mithiamte chuan Vawk pulhri leng hi February thla hi chuan a rem vek tawh an rin thu an sawi.