Deputy Chief Minister in hawng

Mizoram Upa Pawl (MUP) Durtlang Branch in Building an sak thar, Chawlhbuk chu nimin khan Deputy Chief Minister Tawnluia chuan a hawng.

He building hi kum 2018 atanga sak tan kha niin cheng  nuai 16.20 senga sak a ni a. Art & Culture Department leh UD&PA Department te atanga sum hmuh bakah MLA Local Area Development Fund leh Councillor hnen atangin a sakna tur tanpuina sum an dawng a. Nimin khan Deputy Chief Minister hian Rs.10,000/- a hlan ve bawk a ni.

MUP Chawlhbuk hawnna hunah hian Deputy Chief Minister chuan Mizoram Upa Pawl chu pawl hlu tak, zahawm tak leh tangkai tak a ni tih sawiin, MUP member te chu thalai te Mizo nun zemawi leh chin dan tha leh thalai ten an hriat lohte chu zirtira, kawngkawh hmutu ni a,finchhuahtu ni turin a chah a. Kum upa chungchang a sawina Deputy Chief Minister chuan tunhmaa kum upa lam sawi nana tawng-kam an hman thin, ‘tarchhia’ tih tunlai thalai ten an hmang tawh lo chu lawmawm a tih thu sawiin, “Tarchhia kan awm lova, upa erawh kan awm a, mihring hi kan thawk theih thleng chuan upa kan ni emaw kan hlu vek a ni,” a ti. Tawnluia chuan MUP Chawlhbuk sak nana CM hmasa ten theihtawp an chhuah te, bialtu MLA leh Councillor ten tanpuina an pek te chu a lawmawm tih sawiin, “Hei hian khawtlang tana kan zaa kan tanrualna leh thawhhona a tilang,” a ti bawk.