Mizoram-ah hri kai enkawllai zat tlahniam zel

Mizoram-ah COVID-19 hri kai hmuhchhuah tlahniam ve zelin hri kai enkawllai pawh sang thum aiin an tlem tawh a, niminpiah khan Sample 3897 enfiah niin heng atang hian hri kai 330 hmuh an ni a, Sample enfiah atanga chhutin za zela 8.47 te chuan hri an kai a ni.

Thawhtanni khan ZMC-a RT-PCR Laboratory-ah Aizawl District atanga Sample lak 297 enfiah niin heng atang hian hri kai mi 40 hmuh an ni a, Veng leh khua 14 ami te an ni. Fluorescent Immunoassay Test hmangin Aizawl District-ah Sample 40 enfiah ni bawkin hri kai mi 11 hmuh an ni bawk a, an zinga pakhat hi Kolasib ami niin midang zawng hi Aizawl khawpui chhung ami an ni bawk.

Mizoram District 11-a TrueNat Laboratory atangin niminpiah khan Sample 142 enfiah ni bawkin hri kai mi 19 hmuh an ni bawk a, an zinga 8 te chu Lunglei District-a hri kai hmuh te niin Champhai District atangin 6, Aizawl District atangin 3 leh Kolasib leh Khawzawl District atangin mi pakhat ve ve te an ni.

Heng bakah hian niminpiah khan Rapid Antigen Test hmangin Mizoram-ah Sample 3418 enfiah ni bawkin hri kai mi 260 hmuh an ni bawk a, an zinga 88 te chu Aizawl District-a hri kai hmuh te niin Serchhip District-ah 49, Lawngtlai District-ah 25, Lunglei leh Hnahthial District-ah 21 ve ve, Khawzawl District-ah 14, Mamit District-ah 13, Champhai District-ah 11, Saitual District-ah 9, Kolasib District-ah 5 leh Siaha District-ah mi 4 te an ni.

Nimin khan tlai dar 5:00 thlengin Mizoram-ah hri kai mi 354 enkawl dam an ni leh bawk a, heti hian nimin tlai dar 5:00 thlenga hri kai hmuhchhuah tawh chu 1,36,784 niin an zinga 1,33,510 te chu enkawl dam an ni tawh a, hri kai hmuhchhuah atanga chhutin za zela 97.61 te chu enkawl dam an ni tawh a, hri kai enkawllai 2766 an la awm mek a ni. Nimin khan tlai dar 5:00 thlengin hri kai boral an awm belh lo a, hri kai zingah mi 508 an boral tawh a ni.