Chanchin thar thenkhat :

Bamboo Link Road sawiho

Nimin khan Chief Minister Zoramthanga hovin CM Conference Hall-ah Bamboo Link Road chungchanga hmalakna tur hrang hrangah Bamboo Development Board thutkhawm neih a ni a, he hunah hian Chief Minister chuan tunhnaia Union Finance Minister Nirmala Sitharaman-i hnena Mizoram mamawh a thlen zinga Bamboo Link Road Pilot Project chungchang hmalakna, Bamboo Link Road siamna hmunhma en thlithlai leh Area identification chungchang a meeting koh a nih thu a sawi a. Union Finance Minister chuan cheng vbc. 100 vel DPR siam tura thurawn a lo pek thu sawiin, a tirah Aizawl District chhunga Pilot Project siam phawt a nih tur thu a sawi bawk a. Bamboo Link Road hi feet 18 vela zau, pavement feet 10 a siam tum a nih thu a sawi bawk. Meeting hian Bamboo Link Road atana ram rem tha en turin karleh lamah fehchhuah nise, report te ziah fel a nih hnu December thla tawp lamah Bamboo Link Road Board leh Bamboo Development Board Joint Meeting neih a rel a ni.

Training nei tur mi 12 kal

Information & Public Relations Department buatsaihin PRIDE, Lok Sabha, New Delhi-a Training nei turin Journalist leh I&PR Officer 12 te chuan nimin khan Delhi an pan a, India ram a rorelna In sang PRIDE, Lok Sabha a Mizoram Media mite training theihna tur hian I&PR Minister Lalruatkima chuan theihtawp chhuahin kum 2019 September thla khan Batch hmasa training tir an lo ni tawh a ni. Heng mi 12 te hian tunkar Inrinni khian Aizawl an rawn thleng leh ang.

Leitlang Aieng tlangzarh

Lunglei High Powered Committee Office leh District Horticulture Office, Lunglei tang-kawpin cheng nuai 15 senga Lunglei District chhung hmun 3-a Aieng Herna khawl (Leitlang Aieng) an bun tur HPC Vice Chairman Lawm-awma Tochhawng MLA chuan a tlangzarh a, heng khawl zinga pahnih hi Lunglei-ah bunin Lungsen-ah pakhat bun a ni bawk ang.

PPE thui man pek phut

Congress Thalaite chuan Mizoram-a mimal in Personal Protective Equiptment (PPE) an thuina, hak 3191 man chu Mizoram sawrkar in a la bat sak nia sawiin, heng te hi mi 60 ta niin pakhat Rs. 150/- a thuiin a vaiin Rs. 4,78,650/- niin an sawi a. Kumin Krismas hma ngeia Bill bat hi pek an phut thu an sawi bawk.

ZORO in dem thu sawi

Myanmar sipaiten an ram hruaitu Aung San Suu Kyi hrenga chhuanlam ho tak tak hmang a sipai rorelna Court-in thiamloh chantir a kum li (4) lung In tang tura a rel chu Zo Reunification Organisation (ZORO) chuan an dem thu sawiin, a rang thei ang bera chhuah leh nghal tura an phut thu an sawi bawk.

Synod Inkhawmpui nei tan

Mizoram Synod Inkhawmpui vawi 98-na chu nimin atang khan Aizawl Republic Veng Pastor Bial-a Republic Veng Kohhran biak In ah neih tan a ni a, Pathianni lo awm tur thleng khian neih a ni ang. Synod inkhawmpui-ah hian tun thla ni 1 atang khan Board leh Committee hrang hrang thutkhawm neiin nimin khan Nomination Committee an thukhawm leh a, Vawiin atanga Inrinni thleng khian rorelna neiin Pathianni-ah Pastor nemnghehna leh Pro. Pastor dahnghehna neih a ni ang. Kumin hian hri leng ala ziaawm loh avangin zanlam inkhawm a awm lo ang.

Eight Schedule-a tawng dah turin tehna mumal awmlo

Sawrkar laipui chuan ram Danpui Eight Schedule-a tawng thar dahlut turin tehna mumal tak siam a ni lo, a ti. Lok Sabha-a zawhna chhangin Union Minister of State for Home Affairs Nity-anand Rai chuan hnambil tawng chu danglam reng a ni a, vantlang leh hnam nun, eibar dinhmun leh politics chevelin nasa takin a nghawng a ni, a ti a. Kum 1996-a Pahwa Committee leh kum 2003-a Sitakant Committe ten Eight Schedule-a tawng dahluh dawna thlan dan tur kaih-hruaina nghet siam tum pawh tihpuitlin theih a ni lo a ti bawk.

Union Minister chuan Vawiin thlengin Eight Schedule-ah hian tawng 22 dahluh tawh a ni tih sawiin, hetihlai hian sawrkar pawhin tawng dang dahluh a tul dan leh mipui rilru pawh a hrethiam tih a sawi bawk.