Mamit MJA Member in tlawh

Serchhip District tlawha rawn zin Mamit District MJA te chuan nimin khan Serchhip leh a chhehvel-a Agriculture Department leh Horticulture Department te hmalakna an tlawh.

Mamit District MJA Member mi 7 te hian nimin zing khan Serchhip Agriculture Complex-ah Ran chaw (Vaimim) herna te, Tel herna leh Dal herna te tlawhin Agriculture Department hotu ten an hma-lakna hrang hrangte an hrilhfiah a ni. Hemi hnu tukthuan eikhawm-ah Horticulture Department in Lengte ram-a Centre of Excellence an kalpui mek chu tlawhin Horticulture Department atangin Demonstrator C. Lalhmangaiha chuan an hmalakna te a hrilhfiah a, kum 2013 atanga helai hmuna hma an lo lak dan leh kum 2015-ah a hawnna neiin cheng nuai 500 senga bul tan a ni tih a sawi a, helai hmun hi Hectare 4/5 vela zau a ni tih sawiin, an huamchhungah hian kut-hnathawktu mi 60 vel an awm thu a sawi bawk a. Nikum khan helai hmun atang hian Dragon Fruit kung 50,000 vel chin tura pechhuakin kumin hian kung 1,30,000 vel pekchhuah leh tum a nih thu a sawi bawk.

Hemi hnu hian Bawngchawm tlang-a Paragliding Take-Off Point pawh tlawh nghalin MASA Sub-Hqrs. Serchhip President C. Lal-hminghlua leh a thawhpui ten an lo dawngsawng a, helai hmuna Pilot ten Training an neih mek thu leh naktuk mai-ah Training hi zawhfel beisei a ni tih sawiin, helai hmuna Training nei mek te chu an thlawkchhuak lai te an thlir nghal a ni.

Nimin chawhnu lam khan Mat phai tlawh nghalin Serchhip Horticulture & Agriculture Cooperative Society Chairman PC. Siamliana chuan a kaihruai a, Mat Phai-a Bawkbawn an chinna hmun te tlawhin kumin a ruahsur avanga harsatna an tawh te hrilhin, hei vang hian kumin hian Zikhlum pawh an thar tlem leh an thar tlai an rin thu te a sawi bawk. Hemi hnu nimin tlai khan Kawlri tlang-a Chawngpuii nu Lunglen tlang pawh an tlawh nghal a ni.

Comments

Popular News (Last 30 Days)

Serchhip DCSO sawn a ni

Bawngchawm tlang khualbuk rawktu nia hriat mi 2 man