Hri kai thar 437 leh enkawl dam 269 awm belh

Niminpiah Thawhlehni khan Mizoram-ah Sample 5065 enfiah niin heng atang hian COVID-19 hri kai mi 437 hmuhchhuah an ni a, Sample enfiah atanga za zela 8.63 te chuan hri an kai a ni.

Niminpiah khan ZMC-a RT-PCR Laboratory-ah Aizawl leh Mamit District atanga Sample lak 395 enfiah niin heng atang hian hri kai mi 25 hmuh an ni a, an zinga 23 te chu Aizawl District atanga Sample lak niin Mamit District atangin hri kai mi pahnih hmuh an ni bawk. Aizawl-ah hian Fluorescent Immunoassay Test hmangin Sample 86 enfiah ni bawkin hri kai mi 11 hmuh an ni a, an vai hian Aizawl khawpui chhung ami te vek an ni bawk.

Heng bakah hian Aizawl leh Siaha tihloh District hrang hranga TrueNat Laboratory-ah niminpiah khan Sample 188 enfiah ni bawkin heng atang hian hri kai mi 53 hmuh an ni a, an zinga 18 te chu Champhai District-a hri kai hmuh te niin Lunglei District-ah 15, Khawzawl District-ah 8, Hnahthial District-ah 5, Serchhip District-ah 3 leh Mamit leh Lawngtlai District atangin pahnih ve ve te an ni.

Rapid Antigen Test hmangin niminpiah khan Sample 4396 enfiah ni bawkin heng atang hian COVID-19 hri kai mi 348 hmuh an ni bawk a, an zinga 132 te chu Aizawl District-a hri kai hmuh te niin Lunglei leh Lawngtlai District atangin 33 ve ve, Champhai District atangin 31, Mamit District atangin 28, Saitual District atangin 24, Siaha District atangin 22, Serchhip District atangin 19, Kolasib District atangin 12, Hnahthial District atangin 8 leh Khawzawl District atangin mi 6 te an ni.

Nimin khan tlai dar 5:00 thlengin Mizoram-a hri kai mi 269 te enkawl dam an ni leh a, heti hian nimin tlai dar 5:00 thlenga Mizoram-a hri kai hmuhchhuah chu 1,34,810 niin an zinga 1,30,781 te enkawl dam an ni tawh a, hri kai hmuh atanga za zela 97.01 te enkawl dam an ni tawh a, hri kai enkawllai 3532 la awmin nimin-ah hri kai mi 4 lai boral awm lehin Mizoram-a hri kai zingah mi 497 an boral tawh a ni.