Home Minister in Bungtlang khua ah HSLC-a zirlai tithate lawmpuina a hmanpui

Serchhip District-a Govt. Bungtlang H/S chuan kumin (2021)-a HSLC (pawl 10) Exam-a result tha tak an neih lawmna leh zirlai tithate chawimawina hun nimin khan an School-ah an nei a, he hun hi Bialtu MLA leh Home Minister Lalchamliana chuan Khuallian niin a hmanpui a ni.

Govt. Bungtlang H/S-a he hun hmanna hian Home Minister Lalchamliana chuan he School in result tha tak an nei chu a lawmpui thu sawiin, he School in a din tirh atangin HSLC-ah zirlai zaa za pass tum 5 lai nei tawhin kumin ah phei chuan Distinction-ah mi 7 pass in he School atanga kum khat a Distinction-a pass an tam ber tum a nih thu a sawi a, tuna an dinhmun chu duhtawk mai lova tan la zel turin a chah bawk. Home Minister chuan a bul tan that chu thil pawimawh tak a nih rualin a tawp tha taka khar pawh a pawimawh thu sawiin, kum 30 zet zirtirtu hna a lo thawh tawh chhungin pawl leh thildang a inhman avanga an nih tur ang ni phaklo leh BA pawh zo theilo te an awm thin nia a hriat thu a sawi a, zirlai pass thalo te pawh hnual lo tura chahin, an hmabak ah tha taka an zir chuan hlawhtlinna sang zawk an chang thei tih hre reng turin a chah bawk.

Home Minister chuan Mizoram sawrkar in zirna leh hriselna lam a ngaih pawimawh thu pawh sawiin, hri leng avanga department dangah hnathawktu lak belh hleihtheih loh a nih laiin Education Department leh Health Department-ah te thawktu thahnem tak lak belh an nih thu a sawi a. Zirlaite chu an zirlai te pass nan chauha zir lo tur leh mi puitling, chhungkua, khawtlang leh ram tana chhawr tlak nih tum turin a chah a. Thawh-rimna hrang hrangah hlawhtlinna a awm tih hre reng turin a chah bawk.

Bungtlang VCP R. Lallawmzuala kaihhruai he hunah hian Khual Zahawm Serchhip District Education Officer B. Zohmangaihi chuan Zirtirtu indaihlohna leh hri leng karah Govt. Bungtlang H/S ten hlawhtlinna sang tak an nei chu lawmawm a tih thu leh a lawmpui thu sawiin, Zirtirtu, zirlai nu leh pa leh khawtlang tanrualna a nih thu a sawi a. Zirlai naupangte chu hlawhtling turin taimak leh tumruh a pawimawh tih hria a an tui zawng leh an tum hre chiang turin a chah a. Smart Phone hman chungchang ah a tangkai zawng leh an zirna atana tangkai zawnga hman tum turin zirlaite chu a chah bawk.

He School Headmaster V. Suresh-a'n a tarlan danin Govt. Bungtlang H/S hi January 16, 1968-ah din niin kum 1979-ah Deficit-ah hlankai a ni a, kum 1991-a Provincialized a ni leh a, kumin a HSLC Exam-ah khan zirlai naupang 42 exam in an pass vek a, Distinction-ah 7, 1st Division-ah 20, 2nd Division-ah 12 leh 3rd Division-ah 3 in an pass a, Mizoram-a zirlai zaa za pass zingah 16-na niin Serchhip District-a sawrkar School zingah a titha ber an ni bawk. Hetianga result tha tak an neih avang hian Bialtu MLA leh Home Minister Lalchamliana chuan MLA Fund atangin Rs. 34,000/- a pek bakah District Bawrhsap hnen atangin lawmpuina thuziak leh pawisafai an dawng bawk.

Nimin a he hun hmanna ah hian zirlai titha Distinction a pass te hnenah Home Minister chuan lawmpuina thuziak hlanin kumin a zirlai HSLC-a pass zawng zawngte leh he School atanga zir-chhuak zinga MZU atanga B.Sc (Environmental Science)-a Gold Medalist Zoramsiami te hnenah pawh lawmpuina pawisafai hlan an ni bawk.

He School-ah hian Headmaster pakhat bakah zirtirtu 4 leh IV Grade 2 an awm mek a, zirtirtu pahnih te hi SEDP atanga rawih niin Zirtirtu indaihlohna avangin zirtirtu mi 3 rawih belh an lo ni tawh thin bawk a. Hri leng avanga he hun hi hman theih a nih lawk loh hnuah nimin khan he hun hi hman a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man