Chief Minister in Union Finance Minister a kawm

New Delhi-a cham mek Chief Minister Zoramthanga chuan nimin khan Union Finance Minister Nirmala Sitharaman-i chu Parliament Building-a a pisa-ah hmuin Mizoram mamawh hrang hrang a sawipui.

Chief Minister hian Mizoram hmasawnna tura sawrkar hmalakna pawimawh ber te zinga mi Mau tihpun leh sawngbawl chungchang Finance Minister hi a sawipui a. Lian tham taka hmalak tum a nih dan hrilhfiahin heta tana pawimawh em em kawng thar Link Road sial a tul zia a sawi a, Sawrkar laipui atangin heta tan hian sum mamawhte pe turin a dil a.  DPR mumal taka siam turin Finance Minister chuan Chief Minister hi thurawn a lo pe a. Tunhnaia Union Finance Secretary hova State Finance leh Planning Secretary te nena meeting an neihah sawiho a nih thu leh an lo umzui zel tur thu a sawi bawk a ni.

Chief Minister chuan HUDCO loan a leiba, ZIDCO leh a hmaa Housing atana State-in a lo bat te chu Sawrkarin a theih anga rulh sak turin Nirmala Sitharaman chu a ngen a, Union Finance Minister hian an lo ngaihtuah zui tur thu Chief Minister hnenah hian a sawi a ni. Hei bakah hian 15th Finance Commission-in Special Grant-a pek tura an recommend tawh Mizoram tana vbc. 500 chuang, Union Finance Ministry in hman a remtih loh chin te chu remtihsak hram turin Chief Minister Zoramthanga hian a ngen bawk a ni. Chief Minister hi State Planning Board Vice Chairman H. Rammawi bakah mi pawimawh dang ten tawiawmin Union Finance Minister nena meeting hlawk tak an nei chu lawmawm a tih thu leh beiseina sang tak a neih thu a sawi a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man