Delhi-a Chief Minister zin rawn haw ta

Sawrkar laipui-a mi pawimawh te dawr-a Delhi-a zin Chief Minister Zoramthanga chuan Inrinni khan Mizoram a rawn thleng leh ta.

Chief Minister hian ni 16 chhung zet Delhi-a a cham hnua Inrinni khan Mizoram rawn thlengin Lengpui Airport-ah MNF Vice President Lalthlengliana hovin MLA leh an Party hruaitu thenkhat ten an lo hmuak a, amah lo hmuaktute hmaah tun tum an zin chu an hlawhtling tak taka an inhriat thu sawiin, “Covid avanga hun rei tak kan boruak tang tawh takte chu pawhdul vek niin, a bik takin Assam nena kan ramri boruak chungchang pawh Assam Chief Minister leh Union Home Minister-te nen hahdamthlak taka lain boruak tha siam a ni,” a ti a. Prime Minister te, Home Minister te, DoNER Minister te leh Minister hrang hrangte an zu dawrna ah hlawhtling an intih thu sawiin, “Ka zuk hmuh dan chuan a hun takah Pathian hian MNF tan hian, Mizoram tan hian, mipuite tan hian kawng hi a hawng zel a ni tih kan hria a, lawmawm kan ti a, a bik takin Prime Minister pawhin a hnena kan sawi, 'E! hei chu kan ti dawn nia' a tithei zel a, lawmawm ka ti,” a ti bawk. Chief Minister hian Vawiin chawhma dar 11:00 hian CM Conference Hall-ah thuthar thehdarhtute a kawm ang.