CSS Hindi Teacher ten Court Order ang anmahni ruai nawn turin Mizoram sawrkar an ngen

Mizoram CSS Hindi Teacher Association chuan High Court Order in anmahni laklet lehna tur thu a chhuah hnuah Mizoram sawrkar chuan CSS Hindi Teacher te a lalet duh lo tih sawiin, sawrkar chu Court Order Re-correct lova anmahni Re-engaged mai turin an ngen tih an sawi.

Inrinni khan Aizawl Press Club-ah thuthar thehdarhtute kawmin Mizoram CSS Hindi Teacher Association chuan an lungawilohna te an sawi a, Mizoram CSS Hindi Teacher Association President Lalchhuanliana chuan Congress Sawrkar lai kum 2017-a an Plan Period tawp hnuah CSS Hindi Teacher mi 1305 chu ban an ni a, heng zingah hian mi 238 ten a hnuah hna an hmu a, tunhnaia Sawrkarin SSA hnuaiah Hindi Teacher 314 a lak turah pawh mi 100 vel bawrin Calling Letter an dawng tih a sawi a. CSS Hindi Teachers te kum 2018-a High Court-a an kal hnuah kumin October ni 21-a order chhuak chuan kum 2017-a ban tak Mizoram CSS Hindi Teachers te chu re-engaged leh vek an nih tur thu a puang tih sawiin, High Court Order a a lan danin ban tak te daih tawk post a awm thu leh Centrally Sponsored Scheme (CSS) kaltlangin heng Hindi Teachers te qualification an neih ang ang nen Samagra Shiksha Project hnuaiah lak leh an nih tur thu a tarlang tih a sawi.

Hetiang hi High Court thutlukna a nih laiin Sawrkar lam chuan Court Order awmsa siamthat an tum tih pawh he hunah hian sawiin, hei hi anmahni zingah a tam zawk chu trained chhuaklo an nih vang nia a lan thu an President chuan a sawi a. SSA, RMSA, Private Teachers, ADHOC Teachers te pawh Multi-Mode leh Private-a Trained tir an nih laiin CSS Hindi Teachers 2011-17 te chu a hun laiin duh mah se trained phalsak an ni ve lo nia sawiin, hetiang a nih avang hian sawrkar chu Court Order Re-correct lova anmahni Re-engaged mai turin an ngen tih a sawi bawk.

CSS Hindi Teacher te sawi dan chuan Assam sawrkar chuan Central lamah Utrained Teacher & Un-Qualified Teachers te training na hun leh Un-Qualified Teacher te mahni an lo in upgrade theihna atan kum 5 hun relaxation pe turin a ngen sak a, Ministry of Human Resource Development (MHRD), Dept. of School Education & Literacy, Govt. of India chuan a pawmsak a. Assam sawrkar-in Central sawrkar a ngen ang hian Mizoram sawrkar pawhin a duh chuan min dilsak thei tih an hriat thu sawiin, hemi chungchanga hma laksak turin Mizoram sawrkar hnenah Nov. 15, 2021 khan ngenna leh dilna lehkha an thlen tawh thu an sawi bawk.