Latest News

Chanchin thar thenkhat :

MP in Home Minister a hmu

Mizoram Lok Sabha MP C. Lalrosanga chuan nimin tlai khan Union Home Minister Amit Shah chu Parliament House a Office-ah hmuin Mizoram mamawh thenkhat a sawipui a. He an inkawmna ah hian Lok Sabha MP chuan Aizawl atanga Zokhawsang-a Assam Rifles sawnchhuah chungchangah hma thar la turin Union Home Minister chu a ngen a. Assam Rifles sawnchhuahna tur hmunhma te buatsaih a nih tawh avangin Aizawl khawpui tihthawl nan an insawnchhuah a ngai tih a hrilh a ni. Lok Sabha MP chuan Myanmar atanga raltlante chhawmdawlna kawnga sawrkar laipui tanpuina pawh ngenin, Covid-19 dona leh a hri kaite enkawlna lama tanpuina Mizoram in a mamawh belh thu a hrilh bawk a. Mizoram tana Central Armed Police Force Battallion din turin Union Home Minister chu a ngen bawk.


CS in Florist Fair a hawng

Mizoram Florist Association (MFA) buat-saih Florist Fair chu nimin khan Chief Secretary Dr. Renu Sharma chuan Aijal Club Park-ah a hawng a, December 3 thleng awh tur he Fair hawnna ah hian Chief Secretary chuan MFA ten sawrkar tanpuina tel lova Flower Fair changtlung tak an buatsaih thei chu chhuanawm a tih thu a sawi a. Lengpui Airport leh Aizawl khawpui hmun laili a Gandhi lim dahna hmunah pangpar huan mawi taka an enkawl chu lawmawm a tih thu a sawi bawk. Mizoram Florist Association hi Nov. 11, 1997 khan din a ni.


Zangnadawmna pe turin ti

National Human Rights Commission (NH-RC) Law Division, New Delhi chuan tunhnai khan Mizoram Chief Secretary hnenah lehkha thawnin Nov. 1, 2018-a Kolasib District Jail-a a tan laia boral Lalropuia (36), Thingdawl chu Jail chhunga a dam loh laiin Doctor-in damdawi hmanga a enkawl loh avangin sawrkar kuta a awm laia thi ah a ngai tih sawiin, hei hi Dan bawhchhiatna a nih avangin chawlhkaar 6 chhungin a chhungte hnenah zangnadawmna cheng nuai 3 pe turin a ti.


Bru Voter sawn turin thlen

ZPM Thalai Sr. Vice President Dr. C. Lalram-mawia chuan Tripura-a awm Bru, Mizoram-a vote la nei te an awmna nghet Tripura-a an vote transfer tura ngenna lehkha lehkha Election Commission of India-ah thawnin a copy hi Mizoram CEO hnenah a hlan bawk a. Inthlan dawn apiangin Bru vote kan in duhloh siak thu leh sawrkârna lo siam tawh Party-te zîngah a taka Bru vote transfer tura hma la ngam an awm si loh avangin ZPM Thalaite chu a takin an che chhuak ta niin a sawi.


BJP in Minister-ah thlen

BJP Mizoram Pradesh President Vanlal-hmuaka chuan nimin khan Minister of External Affairs Subrahmanyam Jaisankar chu New Delhi-a a Office-a hmuin Myanmar raltlan Mi-zoram chhunga awm te tanpuina pek dan tur leh Kaladan Multi-Modal Transit Transport Project peih thuai theih dan tur a sawipui a. Union Minister hian a rang lama hmalak a nih tur thu leh a hmalakna pawh hrilhhriat a nih tur thu a sawi tih BJP thuchhuah chuan an tarlang.

Comments

Popular News (Last 30 Days)