Union Agriculture Minister hnenah HDB Vice Chairman in Mizoram mamawh a thlen

Horticulture Development Board Vice Chairman Prof. F. Lalnunmawia MLA chuan Union Agriculture Minister Narendra Singh Tomar chu hmuin Horticulture tih hmasawnna tura Mizoram mamawhte a thlen.

Delhi-a cham mek Prof. F.Lalnunmawia hian Union Agriculture Minister chu Mizoram sawrkar in Horticulture lama a hmalakna leh hmachhawp te sawipuiin, Mizoram-ah Dragon Fruit, Tomato leh Zikhlum tharchhuah a pun chhoh mek thu hrilhin, thei leh thlai thar kawnga hmalak belh zelna turin kumin sawrkar kum kal mek (2021-22) atana MIDH Fund pechuak tur te, Dragon Fruit chinna tur sum pek belh tur te, Horticulture Centre of Excellence tih changtlunna tur sum pe tur te, Mizoram a thei leh thlai tharte dahthatna (Cold Storage/Warehouse) leh sawngbawlna changtlung zawk siamsak turte in a ngen a ni. 

Union Agriculture Minister chuan Mizoram a Dragon Fruit leh Tomato tharchhuah pung chho mek chu lawmawm a tih thu sawiin, Horticulture lama Mizoram mamawh a thlente chu tih hlawhtlin sak a tum thu leh Official te nena an lo enzui tur thu a sawi a ni.

Hei bakah hian Prof. F.Lalnunmawia hian Dr. Anand K. Singh, Dy. Director General (Horticulture), ICAR leh Dr. B.K.Pandey, Asst. Director General te pawh kawm bawkin Horticulture a Mizoram hmachhawp te a sawipui a. Dr. A.K.Singh pawhin Mizoram a Dragon Fruit chin a hlawhtling chho mek chu lawmawm a tih thu leh Dragon Fruit hi Delhi leh khawpui dangah te man to zawka hralhna tur a tam thu a sawi a; Horticulture Development Board Vice Chairman sawm angin Dy. Director General (Horticulture) hian kum tawp lamah Mizoram a lo zin a tum thu a sawi a ni.

Comments

Popular News (Last 30 Days)

Serchhip DCSO sawn a ni

Bawngchawm tlang khualbuk rawktu nia hriat mi 2 man